Pajhwok Afghan News

په افغانستان کې د لومړي ځل لپاره د «اکسېجن تولید» دستګاه جوړه شوه

کابل (پژواک،۱ چنګاښ ۱۴۰۰): د «کابل طبي علومو پوهنځي ــ او د ابو علي ابن سینا طبي تجهیزاتو ترمیم» د لومړي ځل لپاره وکولای شول د اکسېجن د تولید دستګاه جوړه کړي، دغه دستګاه په یوه دقیقه کې د ۱۵ لېتر اکسېجن د تولید وړتیا لري او بازار ته به په ۵۰ سلنه ټیټه بیه وړاندې شي.

لوړو زده کړو وزارت په یوه خبرپاڼه کې ویلي چې دغه دستګاه د «کابل ابو علي ابن سینا طبي علومو پوهنتون» د تخنیکي ټېم له خوا « د طبي تجهیزاتو ټکنالوجۍ او ترمیم کمیونتي کالج» په همکارۍ جوړه شوې ده.

د لوړو زده کړو وزارت علمي مرستیال د یادې دستګاه د لیدلو پر مهال د دغه بنسټ له خوا د دستګاه جوړېدل وستایل او ویې ویل، په اوسنیو شرایطو کې خلک او حکومت له اکاډمیکو بنسټونو همدا تمه لري.

نوموړي زیاته کړه: ((په اوسنیو حالاتو کې چې هېواد کې اکسېجن ته اړتیا احساسېږي، دغه اقدام د ملت پر وړاندې د مسوولیت د احساس او وطن دوستۍ ښکارندوی دی.))

نوموړي وویل، د لوړو زده کړو وزارت هڅه کوي چې د طبي علومو له پوهنتون سره په همکارۍ د یادې دستګاه جوړېدل ډېر او د تولید کچه یې لوړه کړي.

د طبي تجهیزاتو ټکنالوجۍ او ترمیم کمیونتي کالج امرې پوهنمل پښتنې بنايي وویل: ((دغه دستګاه په یوه دقیقه کې ۱۵ لېټره اکسیجن تصفیه او تولیدوي چې د سون ډېری توکي یې له زئولیت (Zeolite) پرته چې له ایران هېواده پېرل شوي پاتې یې د افغانستان په بازارونو کې اخیستل شوي.))

هغې زیاته کړه، په یاد علمي بنسټ کې د جوړې شوې دستګاه بیه په بازار کې درې چنده لوړه ده.

سرچینې لیکلي چې تېر کال د کرونا ویروس د لومړۍ څپې په ډېرېدو سره د کابل طبي علومو پوهنتون وتوانېد چې د مصنوعي تنفس دستګاه (Ventilator) جوړه کړي چې د کرونا ناروغانو لپاره د روغتیايي خدمتونو په وړاندې کولو کې یې حیاتي رول درلود.

دا په داسې حال کې ده چې هېواد کې د کرونا ناروغۍ په ډېرېدو سره اکسېجن ته اړتیا زیاته شوې او ان د هېواد په ولایتونو کې ځينې روغتونونه د اکسېجن له کمښت سره مخ شوي دي.

د عامې روغتیا وزارت د رسمي شمېرو له مخې، په افغانستان کې د کرونا ناروغۍ له خپرېدو راهیسې تر ۱۰۵ زره ډېر کسان پر دې ناروغۍ اخته شوي او ۴۲٩٣ کسانو یې له امله ساه ورکړې ده.

د راپورونو له مخې، تر اوسه په ټوله نړۍ کې تر ۱۷۸ میلیون ډېر کسان پر کرونا ناروغۍ اخته شوي او له دې ډلې ۳،۸ میلیون کسانو ساه ورکړې ده.

Views: 148

Exit mobile version