پل علم (پژواک، ١٤ چنګاښ ١٤٠٠): د لوګر والي وايي چې طالبان د پاکستان د ګټو لپاره جګړه کوي، نو ټول يې بايد پر وړاندې ودريږي او له امنيتي ځواکونو دې ملاتړ وکړي.
د لوګر ولايت په مرکز پل علم کې د چنګاښ په ١٤مه د جمهوريت او امنيتي ځواکونو په ملاتړ غونډه جوړه شوې وه.
په دې غونډه کې قومي مشر سید نثار علي موسوي وویل: ((موږ د خپل نظام تر څنګ ولاړ یو او پنجاب به پرې نږدو چې خپلو موخو ته ورسېږي، موږ د پنجاب د استعمار پر وړاندې جنګېږو او هېڅ وخت به له دغې مبارزې نه په شا نه شو.))
دغه راز ديني عالم مولوي مهراب الدین وويل چې د اسلام له نظره په افغانستان کې روانه جګړه ناروا ده بايد مخه يې ونيول شي.
ده وويل: ((موږ د لوګر علما د خپل نظام او افغان ځواکونو تر څنګ ولاړ یو او هېڅ وخت به اجازه ور نه کړو چې څوک زموږ هېواد د بدبختیو پر لوري روان کړي.))
همدارنګه د ولایتي شورا ريیس حسیب الله ستانکزي وویل چې طالبان د پرديو د ګټو لپاره جګړه کوي.
ده وويل: ((د طالب فکر تغیر نه دی کړی او د پاکستان د ګټو لپاره جګړه کوي. موږ له خپل نظام او خپلو امنیتي ځواکونو ملاتړ کړی او کوو یې.))
د غونډې په پاى کې د لوګر والي عبدالقیوم رحیمي وويل چې طالبان د پردیو په اشاره جګړه روانه کړې او خپل هېواد ورانوي.
دى زياتوي: ((هېواد زموږ مور، عزت او ابرو ده موږ له خپلې مور نه د خپل سره په بیه دفاع کوو.))
رحیمي زیاته کړه چې طالبان نه د حکومتدارۍ لپاره او نه هم د هېواد د پراختیا لپاره پلان او برنامه لري.
ده هم وويل چې طالبان په افغانستان کې د پاکستان په خوښه او ګټو لپاره جګړه کوي، ټول يې بايد پر وړاندې ودريږي او له حکومتي ځواکونو دې ملاتړ وکړي.
د يادونې ده چې تر دې وړاندې هم په بېلابېلو ولايتونو کې ورته غونډې ترسره شوي، خو داسې کومه مثبته پايله يې تر اوسه نه ده ليدل شوې.
Views: 98
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن