د ملګرو ملتونو امنیت شورا د افغانستان په اړه بېړنۍ غونډه کوي

کابل (پژواک، ۱۵ زمری ۱۴۰۰): د ملګرو ملتونو امنیت شورا د افغانستان د وروستیو امنیتي حالاتو په اړه بېړنۍ غوڼده کوي.

په ملګرو ملتونو کې د هند دایمي استازي ټي اېس تیرومورتي په یوه خبرپاڼه کې ویلي چې دا ځانګړې غونډه به د جمعې په ورځ (د زمري ۱۶مه) ترسره شي.

د یادونې ده، هند اوسمهال د ملګرو ملتونو د امنیت شورا دوره یي مشري پر غاړه لري.

دا په داسې حال کې ده چې د افغانستان د بهرنیو چارو وزیر محمد حنیف اتمر دوه ورځې مخکې له خپل هندي سیال ډاکتر جی اېس شنکر سره  په ټیلېفوني خبرو کې په افغانستان کې د وسله والو ډلو او د تاوتريخوالي پر ډېرېدو اندېښنه څرګنده کړې او د افغانستان د وضعيت په اړه يې د ملګرو ملتونو د امنیت شورا د غونډې جوړېدو غوښتنه کړې ده.

اتمر ويلي وو چې ملګري ملتونه او نړیواله ټولنه باید د طالبانو د تاوتریخوالي او ظلمونو له امله د رامنځته کېدونکي پېښو په مخنیوي کې رول ولوبوي.

په ورته مهال د ملګرو ملتونو د امنیت شورا غړو هم په هرات ولايت کې د ملګرو ملتونو پر ودانۍ برید غندلی دی.