<p style="text-align: justify;">کابل (پژواک، ۲۷ کب ۱۴۰۴): ناروې، بریتانیا، اروپایي ټولنې او د بشري حقونو لپاره د ملګرو ملتونو عالي کمېشنرۍ په کابل کې د روږدو د درملنې پر یوه مرکز د پاکستان پر برید خواشیني ښودلې او ټینګار یې کړی چې د ملکي وګړو خوندیتوب دې تضمین شي او دواړه لوري دې شخړې د خبرو له لارې حل کړي.</p>
<p style="text-align: justify;">د پاکستان پوځي رژیم وړمه شپه د کابل ښار د نهمې امنیتي حوزې اړوند سیمه کې د روږدو د درملنې پر یوه مرکز برید وکړ چې له امله یې ۴۰۰ کسان شهیدان شوي او ۲۵۰ نور ټپیان دي.</p>
<p style="text-align: justify;">اروپایي اتحادیې له یاد برید وروسته ویلي چې روان وضعیت باید ژر تر ژره د مذاکراتو له لارې حل شي.</p>
<p style="text-align: justify;">د یادې اتحادیې په اعلامیه کې راغلي چې ملکي وګړي او روغتیایي تاسیسات د نړیوالو قوانینو او د جینوا کنوانسیونونو له مخې خوندي دي او د هېڅ لوري له خوا یې په نښه کول د منلو وړ نه دي.</p>
<p style="text-align: justify;">د بشري حقونو لپاره د ملګرو ملتونو عالي کمېشنرۍ هم ویلي چې د یاد برید په اړه باید په چټکۍ، خپلواکه او شفافه توګه پلټنه وشي او مسوول کسان د نړیوالو معیارونو له مخې حساب ورکړي.</p>
<p style="text-align: justify;">د یادې کمېشنرۍ په اعلامیه کې راغلي چې د دې پلټنې پایلې باید له خلکو سره شریکې شي او د پېښې قربانیانو او د هغوی کورنیو ته باید تاوان ورکړل شي.</p>
<p style="text-align: justify;">سرچینې زیاته کړې چې د نړیوال بشري قانون له مخې ملکي خلک او ملکي هدفونه په بشپړ ډول خوندي دي.</p>
<p style="text-align: justify;">د ناروې د بهرنیو چارو وزارت هم پر یاد برید ژوره خواشیني څرګنده کړې او ویلي یې دي چې روغتیایي مرکزونه او ناروغان هېڅکله باید د بریدونو هدف ونه ګرځي.</p>
<p style="text-align: justify;">یاد وزارت له ښکېلو لورو غوښتي چې زغم ولري، د خبرو له لارې شخړو ته د پای ټکی کېږدي او امنیتي اندېښنې په سولهییز ډول حل کړي.</p>
<p style="text-align: justify;">د ناروې د کډوالو شورا عمومي منشي، جان ایګیلنډ، هم پر یاد برید خواشیني ښودلې او لیکلي یې دي: «موږ په خپلو سترګو د ملکي وګړو او روغتون پر وړاندې د دې پېښې ویجاړونکی اغېز ولید چې د راپورونو له مخې یې ګڼ شمېر تلفات اړولي دي.»</p>
<p style="text-align: justify;">هغه ویلي، ټولې خواوې باید د نړیوالو بشري قوانینو له مخې خپل مسوولیت ادا کړي، څو د ملکي وګړو خوندیتوب تضمین شي.</p>
<p style="text-align: justify;">د افغانستان لپاره د بریتانیا ځانګړي استازي، ریچارډ لنډزي، هم پر یاد برید خواشیني ښودلې او ویلي یې دي چې دواړه لوري باید ستونزې د خبرو له لارې حل کړي.</p>
