ولسمشر غني له خپلې کورنۍ سره اماراتو کې دی

کابل (پژواک، ۱۸ زمری ۱۴۰۰) : د متحده عربي اماراتو د بهرنیو چارو وزارت اعلان کړی چې ولسمشر محمد اشرف غني له خپلې کورنۍ سره په دې هېواد کې مېشت شوی دی.

د اماراتو د بهرنیو چارو وزارت په یوه لنډه اعلامیه کې ویلي، د ولسمشر غني او د هغه کورنۍ ته یې د بشردوستۍ له مخې هرکلی ویلی دی.

ولسمشر اشرف غني د یکشنبې پر ماښام پر کابل د طالبانو تر ولکې څو ساعته وړاندې له پلازمېنې وتلی و او تر دې دمه یې ځای ځایګی نه و څرګند.

تر دې مخکې ویل شوي وو، چې هغه له خپلو نږدې سلاکارانو سره ښایي تاجکستان یا ازبکستان ته تللی وي. داسې هم ویل کیدل چې ولسمشر غني په عمان کې دی.

خو اوس متحده عربي اماراتو رسماً منلې ده چې ولسمشرغني له خپلې کورنۍ سره په دې هېواد کې دی.

له هېواده تر وتلو څو ساعته وروسته محمد اشرف غني پر خپله شخصي فېسبوک پاڼه لیکلي، په کابل ښار کې د وینې تویېدنې د مخنیوي لپاره یې پرېکړه وکړه چې ارګ پرېږدي او له هېواده ووځي.

بلخوا د ولسمشر اشرف غني لومړی مرستیال امر الله صالح پرون ادعا کړې وه، چې د افغانستان د اساسي قانون له مخې دی د افغانستان سرپرست ولسمشر دی.