مزارشريف (پژواک، ۱۵ وږی ۱۴۰۰): د بلخ په مرکز مزارشريف ښار کې د ښځو حقونو يو شمېر فعالانو د يوه لاريون په ترسره کولو غوښتنه وکړه چې په راتلونکي حکومت او نظام کې دې د دوی ځای او حقونه خوندي شي.
دغه ښځې چې د وږي په ۱۵مه يې په مزارشریف کې د حضرت علي روضې په سوېلي دروازه کې لاريون پيل کړ، وروسته یې د يوه پرېکړه ليک په خپرولو سره پای ته ورساوه.
د لاريون کوونکو يوه غړې قدسيه شجاع زاده وايي چې د افغانستان ښځې په راتلونکي نظام کې د خپل ځای او موقف په اړه اندېښمنې دي.
هغې پژواک ته وويل چې ټولشمول حکومت د ښځو له ګډون پرته کومه معنا نه لري.
شجاع زاده وايي: ((طالبان وايي چې همه شمول حکومت جوړوي، موږ وايو چې د ښځو له حضور پرته دا کومه معنا نه لري، زموږ غوښتنه دا ده چې ښځو ته بايد د کار، زده کړو، سياسي فعاليت او دولتي ادارو کې د دندې اجازه او حق ورکړل شي.))
د هغې په وينا، نړيواله ټولنه بايد د افغان ښځو د تېرو دوو لسيزو لاسته راوړنو په ساتنه کې همکاري وکړي.
د مزارشریف اوسېدونکې شکريه رحيمي چې په دغه لاريون کې يې ګډون کړی و، وايي چې طالبان بايد د افغانستان اوسني واقعيتونه ومني.
هغې وويل چې فردي ازادي بايد سلب نه شي او ښځې بايد مجبورې نه شي چې په کور کېنول شي.
د هغې په وينا، طالبان بايد خپلې ژمنې عملي کړي او د مېرمنو حقونه دې ورکړي.
نوموړې وايي چې د حکومت د رهبرۍ په کچه کې هم بايد ښځو ته ونډه ورکړل شي.
مزارشریف کې د ښځو د حقونو فعالانو د خپل لاريون په پای کې يو پرېکړه ليک هم خپور کړ چې په کې په راتلونکي نظام کې د ښځو پر مشارکت ټينګار شوی و.
په پرېکړه ليک کې همدا راز ويل شوي وو چې افغان ښځې بايد د حکومت د رهبرۍ په کچه د دندې ترسره کولو حق ولري.
په ورته مهال په شمال زون کې د طالبانو د دعوت او ارشاد کمېسيون مشر مولوي عبدالقدير حليم رسنيو ته وويل چې دوی ښځو ته د اسلامي اصولو په رڼا کې د هغوی د حقونو ورکړې ته ژمن دي.
هغه زياته کړه چې يو شمېر ورانکاري کړۍ غواړي څو افغان مېرمنو ته د هغوی د حقونو په تړاو اندېښنې ور پيدا کړي.
نوموړي وويل: ((موږ به وښايو چې ښځو ته ټول هغه حقونه ورکوو چې اسلام ورکړي، دوی به د اسلامي اصولو مطابق له خپلو ټولو حقونو برخمنې وي، په دې اړه دې تشويش نه کوي.))
مولوي حليم وايي چې افغانې ښځې د نوي نظام او حکومت له جوړېدو وروسته کولای شي خپلې غوښتنې مطرح کړي.
له کابل، هرات او نیمروز ولايتونو وروسته بلخ څلورم ولايت دی چې يو شمېر ښځې په کې د خپلو حقونو خونديتوب په موخه لاريون کوي.
معترضين وايي چې د خپلې حق غوښتنې دغه غږ به د هيواد له نورو ولايتونو څخه هم پورته کړي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن