خصوصي شرکتونه کولای شي په میاشت کې ۲۵زره ډالر له بانکونو واخلي

کابل (پژواک، ٢٨ وږى ١٤٠٠): د افغانستان بانک وايي، له دې وروسته ټول شرکتونه کولی شي چې له خپلو بانکي حسابونو په میاشت ۲۵زره امریکايي ډالر ترلاسه کړي.

د افغانستان بانک د روان کال د وږي ۲۴مې نېټې مکتوب چې پژواک خبري اژانس یې کاپي ترلاسه کړې، ښيي چې ټول خصوصي شرکتونه د میاشتې تر ۲۵زره امریکايي ډالرو له بانکونو ایستلی شي.

په دغه مکتوب کې راغلي چې بانکونه او د بهرنیو اسعارو استازولۍ له دې وروسته د شرکتونو له بانکي حسابونو په څلورو اوونیو کې ۲۵زره امریکايي ډالر یا د دې پیسو معادل افغانۍ شرکتونه ته ورکولی شي.

دا په داسې حال کې ده چې طالبانو څه باندې یوه میاشت مخکې کابل ونیو او وروسته د یوې مودې لپاره بانکونه وتړل شول او دا مهال هيچا ته په اوونۍ کې تر شل زور افغانیو او دوو سوو ډالرو زیاتې پیسې نه ورکوي.

دغې چارې خلک او دغه راز سوداګریز بهیر له سختو ستونزو سره مخ کړی دی.

د پژواک د یو راپور له مخې، د خصوصي شرکتونو یو عشاریه دوه میلیونه کارکوونکو تنخواوې پر بانکونو د محدودیوتونو د لګېدو له امله ځنډېدلې دي.