سويلي افريقا افغانستان ته په تمريناتي لوبه کې ماتې ورکړه

کابل (پژواک ۲۶ تله ۱۴۰۰): سويلي افريقا د کرکټ د شل اوريز نړيوال جام په تمريناتي لوبه کې افغانستان ته په ۴۱ منډو ماتې ورکړه.

دغه لوبه نن د (د تلې ۲۶مه) د افغانستان په وخت ۲:۳۰ بجې په ابوظبۍ کې تر سره شوه.

د راپورونو له مخې د لوبې په لومړي پړاو کې سويلي افريقا افغانستان ته د ۱۴۶ منډو هدف وټاکه.

د افغان لوبډلې په توپ اچوونکو کې مجیب الرحمن درې, محمد نبي او نوین الحق يو يو لوبغاړي وسوځول.

د لوبې په دويم پړاو کې افغانستان د شلو اورونو او ۹ لوبغاړو په سوځېدو سره ۱۱۴ منډې جوړې کړې او په ۴۱ منډو يې افريقا ته خپله لوبه وبايلله.

په افغان لوبډله کې ۳۳ تر ټولو ډېرې منډې محمد نبي جوړې کړې.

دغه راز افغانستان به راتلونکې لوبه د راتلونکې چهارشنبې په ورځ له ويسټنډيز سره ترسره کړي.

د يادونې وړ ده چې د نړیوال جام شل اوريزې لوبې تېره ورځ په متحدو عربو اماراتو او عمان کې پیل شوې دي.