ترینکوټ (پژواک، ۲۶ تله ۱۴۰۰): د اروزګان د مرکز ترینکوټ او یو شمېر نورو ولسوالیو هغه سیمې چې کلونه د جګړې لومړۍ کرښې وې اوس په مېله ځایونو بدلې شوې دي او ډلې ډلې خلک د تفریح او ساعت تېرۍ لپاره ورځي.
په اروزګان کې چې په تېرو کلونو کې د ناامنیو او جګړو له امله په کې تفریحي پارکونه نه دي جوړ شوي، همدا د خلکو د تفریح او مېلې یوازیني ځایونه دي.
په وروستیو کلونو کې همدا تفریحي سیمې د جګړې په ډګر بدلې شوې وې چې هیچا هم د ورتګ زړه نه شوای کولای.
خو اوس چې طالبانو د ټول هېواد واګې ترلاسه کړي او جګړه درېدلې، اروزګانیانو یو ځل بیا خپلو پخوانیو مېله ځایونو ته مخه کړې ده.
یو له دغو تفریحي ځایونو د چورې ولسوالۍ د مزار بابا په نوم تفریحي سیمه ده چې هره ورځ او په ځانګړې توګه د جمعې په ورځو کې له مرکز ترینکوټ او نورو سیمو څخه خلک د تفریح او مېلې لپاره ورځي.
د ترینکوټ یوه اوسېدونکي میرا جان په دې اړه پژواک خبري اژانس ته وویل، له خپلو څلورو ملګرو سره یو ځای کلونه وروسته دغې سیمې ته د تفریح لپاره راغلی دی.
هغه زیاته کړه، خوشحاله دی چې کلونه وروسته جګړه درېدلې ده او خلکو ته د تفریح کولو زمینه برابره شوې ده.
دی وايي، هره ورځ دغې سیمې ته په سلګونو کسان راځي، له ځانونو سره خوراکي او نور توکي راوړي او همدلته پخلی کوي.
د ده په خبره، د مزار بابا په نوم دا سیمه د اوبو د چینو تر څنګ شنه باغونه او د لوبو لپاره پراخه ساحه لري چې ځوانان او ماشومان په کې بېلابېلې لوبې کوي.
شریف الله بیا هغه مېله وال دی چې له کندهاره دغې سیمې ته د مېلې لپاره راغلی دی.
نوموړي پژواک خبري اژانس ته وویل، په لومړي ځل دغې سیمې ته د مېلې لپاره راغلی او دلته په ښکلې فضا کې له ملګرو سره د لډو لوبه کوي.
هغه هم خوښي وښودله چې جګړه درېدلې او د امنیت له ټینګښت سره یوې او بلې سیمې ته د تګ راتګ زمینه برابره شوې ده.
دا یوازې د اروزګان ولایت د چورې ولسوالۍ نه ده چې دغې تفریحي سیمې ته یې هره ورځ په سلګونو کسان راځي، بلکې د دغه ولایت په خاص اروزګان ولسوالۍ کې د ګرم آب په نوم یوه بله سیمه هم د تفریح او مېلې لپاره ډېره مشهوره ده.
دغې سیمې ته د هېواد د نورو ولایتونو تر څنګ آن له پاکستان څخه هم خلک د مېلې لپاره راځي.
محمد یوسف چې د ګرم آب په نوم دغې تفریحي سیمې ته د مېلې لپاره راغلی، وايي دلته له غره د اوبو یوه چینه هم راوځي چې د دې سیمې ښکلا یې ډېره کړې ده.
دغه راز ده یادونه وکړه چې د یادې شوې چینې اوبه د کال په هر موسم کې تودې وي او د خلکو تر منځ داسې باور موجود دی چې څوک په کې ولامبي نو د بدن دردونه یې ښه کېږي.
د ده په وینا، دغې سیمې ته هر ورځ په سلګونو کسان راځي او ګڼ ناروغان د همدې چینې په اوبو لامبي.
نوموړی وايي، د هېوادوالو هیله دا ده چې امنیت او ثبات دوام ومومي، خلکو ته د ښه او هوسا ژوند امکانات برابر شي.
بل خوا ځايي مسوولین خلکو ته ډاډ ورکوي چې له وېرې پرته کولای شي له یوه بل ځای ته تګ راتګ وکړي او له تفریحي سیمو لیدنه وکړي.
د خاص اروزګان ولسوال مولوي راشد پژواک خبري اژانس ته وویل، د خلکو د خوندیتوب لپاره شپه او ورځ هڅې کوي.
دی وايي، په دغې ولسوالۍ کې یې ټول هغه امکانات برابر کړي چې د خلکو د خوښۍ او هوساینې لامل کېږي.
دغه راز د اروزګان د اطلاعات او فرهنګ ریاست یو مسوول مولوي امین الله له ارزوګانیانو او د نورو ولایتونو له اوسېدونکو غوښتنه کوي چې وخت په وخت دغه ولایت ته سفر وکړي.
هغه وايي، حکومت د ولس د امنیت د خوندیتوب لپاره د بېلابېلو اقداماتو پر عملي کولو بوخت دی.
Views: 156
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن