د کابل ښار دهمزنګ کې د لاسي بم برید کې دوه امنیتي کسان ټپیان شوي

کابل (پژواک، ۲۸ تله ۱۴۰۰): د کورنيو چارو وزارت وايي، د کابل ښار درېیمې امنیتي حوزې اړوند، دهمزنګ څلورلارې ته څېرمه د لاسي بم برید کې دوه مجاهدین ټپیان شوي دي.

دغه برید نن سهار شاوخوا اته بجې شوی دی.

د کورنيو چارو وزارت وياند قاري سعيد خوستي پژواک خبري اژانس ته وویل چې پر امنیتي کسانو یاد لاسي بم له ژوبڼ څخه غورځول شوی دی.

د هغه په وینا چې په دغه برید کې ملکي وګړو ته زيان نه دی اوښتی او د ټپيانو روغتيايي وضعيت د ډاډ وړ دی.

دی وایي چې د پېښې په تړاو تر اوسه څوک نه دي نيول شوي.

د دغه برید مسوولیت چا پر غاړه نه دی اخيستی.