مزارشريف (پژواک، ۲۲ لېندۍ ۱۴۰۰): د بلخ په مرکز مزارشريف ښار کې يو شمېر هټۍوال او عام خلک وايي چې په بازار کې د زړو بانک نوټونو دوران له ګڼو ستونزو سره مخ کړي دي.
دوی زياتوي چې له تېرې يوې مياشتې را پدېخوا د معاملاتو پر مهال زړې پيسې نه ورنه اخيستل کېږي چې له همدې امله يې د پېر او پلور چارې هم ټکنۍ شوې دي.
په بلخ کې د افغانستان بانک سيمه ييز مسوولين بيا د يادې ستونزې د حل په برخه کې د خپلو هڅو يادونه کوي.
محمد رحيم په مزارشريف ښار کې د سړک غاړې پر سر د اسعارو د تبادلې غرفه لري.
هغه له پژواک اژانس سره په خبرو کې وويل چې د وروستيو ورځو تر ټولو لويه ستونزه يې دا ده چې د زړو پيسو اخیستو يا ورکولو پر مهال له لانجو سره مخ کېږي.
نوموړي په داسې مهال چې يو بنډل زړې پيسې يې په لاس کې وې، وویل چې يادې پيسې يې له مشتريانو اخيستې خو اوس چې يې بېرته خلکو ته ورکوي، نه يې ورنه اخلي.
هغه زياته کړه: ((د افغانيو د لسګون، شلګون او پنځوس ګون د راکړې ورکړې پر مهال له ډېرو ستونزو سره مخ يم، دا زما لاس کې د پنځوسيانو بنډل دی، دې کې ځيني داسې شته چې يواځې لږ سولېدلي يا رابرتېپ پرې وهل شوی؛ خو اوس يې څوک نه اخلي، په غم ورسره پاتې يم.))
هغه وايي چې پخوا به افغانستان بانک له بازاره زړې پيسې ټولولې؛ خو اوس حتی بانک هم بېرته له خلکو زړې پيسې نه اخلي.
عبدالله د مزار ښار بل اوسېدونکی دی چې د ګازرو اوبو پلورلو دوکان لري.
هغه پژواک ته وويل چې د ګازرو هر ګيلاس اوبه پر لس افغانۍ پر مشتريانو پلوري؛ خو په دې ورځو کې يې د زړو پيسو د دوران له امله کاروبار خراب شوی دی.
نوموړی زياتوي چې مشتريان ده ته زاړه لسګونان ورکوي؛ خو بېرته يې له ده څخه بيا نه اخلي.
عبدالله وويل: ((دا زما لاس کې زاړه لسګونان وينئ، دا مې په همدې دوو ورځو کې اخيستي، سهار مې مارکېټ کې سودا اخيسته خو دا يې رانه وانه خيستل، اوس حيران يم څه پرې وکړم.))
د هغه په وينا، حکومت بايد په بازار کې د زړو پيسو د ستونزې په اړه يوه حل لاره ولټوي.
په مزارشريف کې د اسعارو د تبادلې مرکزي بازار کفايت مارکېت يوه صراف حاجي خيرالله پژواک ته وويل چې په بازار کې د زړو پيسو چلښت يوه لويه ننګونه ده.
هغه زياته کړه چې په دې تړاو بايد د افغانستان بانک خلکو ته يو قناعت لرونکی ځواب ورکړي.
نوموړی زياتوي چې په بازار کې ډېری بانک نوټونه زاړه شوي او د نوو بانک نوټونو د توزيع لپاره يو لړ چارې شته چې نوی حکومت يې بايد ترسره کړي.
خیرالله وویل: ((پخواني حکومت به زړې پيسې ټولولې او پر ځای به يې نوې پيسې بازار ته عرضه کولې، په اوس وخت کې لویه ستونزه دا ده چې د پيسو چاپ بند دی، بل چې عموماً پيسې د زړېدو او فرسوده کېدو خواته روانې دي.))
په ورته مهال په بلخ کې د افغانستان بانک سيمه ييز مسوولين وايي چې دغه ستونزه به حل کړي.
د افغانستان بانک د بلخ څانګې مسوول مولوي محمد شاهين وایي چې د خلکو دغه ستونزه درک کوي او ياده موضوع يې له مرکزي بانک سره شريکه کړې ده.
هغه وايي چې مرکزي بانک هم ژمنه کړې چې د اوس لپاره په بازار کې زړې پيسې د چلښت وړ دي او خلک دې په دې تړاو هيڅ تشويش نه کوي.
نوموړی زياتوي چې دغه موضوع يې د بلخ له صرافانو سره هم شريکه کړې او هغوی ورسره ژمنه کړې چې زړې پيسې به په بازار کې دوران ولري.
مولوي محمد شاهين وايي چې په مرکزي بانک د پخواني حکومت له مهاله هم زياتې زړې پيسې پاتې دي.
خلک وايي چې له بازاره د زړو پيسو ټولول او د نوو بانکنوټونو توزيع د مرکزي بانک مسووليت دی او بايد د خلکو د اندېښنو کمولو لپاره دغه بانک موثر اقدامات وکړي.
