فراه (پژواک، ۳۰ لیندۍ ۱۴۰۰) د فراه ولایت اوسېدونکی او مدني فعال، چې کلونه یې د سولې لپاره کار کړی، له خپلو ټولو هېوادوالو غواړي چې په جګړوځپلي افغانستان کې د تل پاتې سولې لپاره هڅې وکړي.
۲۸ کلن حمیدالله حمیدي، د فراه ولایت د مرکز اوسېدونکی دی، فراه کې له دوولسم ټولګي فارغ شوی او د ژورنالیزم پوهنځی یې په کابل پوهنتون کې لوستی دی.
هغه له کلونو راهیسې په هېواد کې د سولې د ټینګښت لپاره هڅې کوي.
حمیدي له پژواک خبري اژانس سره په مرکه کې وویل چې دی ځان مکلف ګڼي چې خپل هېواد کې د سولې د ټینګښت لپاره کار وکړي او له ټولنې د تاوتریخوالیو ټغر ټول کړي.
دی وایي، له همدې امله یې د سولې په تړاو په ډېرو ناستو کې ګډون کړی او تل یې خپل هېوادوال سولې او د یو بل منلو ته رابللي دي.
هغه د بېلګې په توګه وایي، چې ده په هرات کې د سولې کمېټې د مشر په توګه د سولې لپاره ډېرې هڅې کړي او د فراه په ولایت کې يې هم د سولې اړوند ځینې ناستې مدیریت کړې دي.
حمیدي وایي چې د فراه د بېلابېلو ولسوالیو شاوخوا ۴۰۰ ځوانان یې یوې غونډې ته بللي وو تر څو له لارې یې په هېواد کې د سولې د ټینګښت لپاره کار وشي.
دی وایي چې تېر کال د هېواد د استقلال د ورځې په مناسبت یې د سولې کاروان د ځوانانو په ملتیا دغه ورځ ونمانځله او د فراه ښار کې یې د پاکوالي کمپاین تر سره کړ.
هغه وویل چې د کمپاین پر مهال یې له خلکو سره د سولې د اهمیت په تړاو خبرې وکړې او په خپل شخصي لګښت یې د سولې پیغامونه ولیکل او د ښار پر دېوالونو یې راځړولي وو.
د ده په وینا، له دې هڅو یې یوازینۍ موخه دا وه چې هېواد کې سوله ټینګه شي او نور افغانان د جګړو قرباني نه شي.
حمیدي زیاتوي:«په ژوند کی مې دا یوازینۍ هیله ده چې ټول هېوادوال مو په سوله ییز چاپیریال کی ژوند وکړي. پر هېوادوالو مې غږ کوم چې راځئ ټول د تل پاتې سولې لپاره هڅې وکړو.»
فرید خالقي، چې د حمیدالله حمیدي يو له نږدې ملګرو څخه دی او د سولې لپاره په ډېرو فعالیتونو کې يې له هغه سره ونډه لرلې، وایي :«زه له تېرو درېيو کلونو راهيسې له حمیدي سره د سولې په دغه پروسه کې يو ځای کار کوم، ده په دغو کلونو کې بیا د تېر حکومت په وخت کې ډېر وړیا فعالیتونه وکړل او فراهي ولس يې سولې ته راباله.»
دی زیاتوي: «اوس چې اسلامی امارت راغلی، هغه بیا هم خپلو فعالیتونو ته ادامه ورکړې او خلکو ته دا ډاډ ورکوي چې زموږ ګډ افغانستان به دايمي سولې ته ورسيږي.»
Views: 46
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن