په بغلان کې ناپېژاندو وسله والو يو کس وژلی دی

پلخمري ( پژواک،۳۰ لیندۍ ۱۴۰۰): ناپېژاندو وسله والو د بغلان ولایت په تاله او برفک ولسوالۍ کې د حاجي دادعلي په نوم یو کس وژلی دی.

ځايي چارواکي د حاجي دادعلي وژل کېدل تاييدوي، خو وايي نه پوهېږي چې نوموړی به چا او ولې وژلی وي.

د بغلان ولایت د اطلاعات او فرهنګ رییس مولوي مصطفی هاشمي وايي چې تراوسه نه ده معلومه چې حاجي دادعلي چا او ولې وژلی دی.

نوموړی زياتوي چې دادعلي د اسماعلیه فرقې پيرو او د برفک سیمې اصلي اوسېدونکی و، خو له څو کلونو راهیسې په مزار شریف کې اوسېده.

نوموړی وايي، تراوسه د حاجي دادعلي د قتل په تور څوک نه دي نيول شوي او نه هم کومې ډلې يا شخص د دې پېښې مسوولیت منلی دی.

د وژل شوي کس يوه کليوال چې نه غواړي نوم يې واخيستل شي پژواک ته وويل چې حاجي دادعلي وړمه ورځ وژل شوی، د ځمکې د ملکیت پر سر يې له پخوا څخه لانجه درلوده او د حامدکرزي د واکمنۍ پرمهال د مقابل لوري يو کس د ناپېژاندو کسانو له خوا ترور شوی هم و.

یاده دې وي چې تېره اوونۍ هم په بغلان کې یوه ډاکټره په خپل کور کې وژل شوې وه.

Views: 366