کابل (پژواک، ۹ مرغومی ۱۴۰۰): مالیې وزارت وایي چې د دغه وزارت یو څلور کسیز پلاوی د افغان سوداګرو پر مالونو د زیاتې مالیې اخیستو د مخنیوي په موخه پاکستان ته سفر کړی دی.
د دغه پلاوي مشري د مالیې وزارت د عوایدو عمومي ریاست د څېړنو رییس عصمت الله سلیمي پر غاړه ده او ټاکل شوې چې دغه خبرې به تر درېیو ورځو (له چهارشنبې تر جمعې) پورې دوام ولري.
د یاد وزارت په خبره: «د دغه پلاوي د سفر اصلي موخه د ډېرو مالیاتو له اخيستو د ډډې کولو په اړه خبرې دي.
د یادونې ده، د مضاعفو مالیاتو لومړنۍ ناسته په ۲۰۱۶ کال کې ترسره شوه چې په کې دواړه لوري پر څو مادو موافقې ته رسېدلي وو خو د هغې نور موارد پاتې وو.
په دې وروستیو کې د مالیې وزیر پاکستان ته سفر کړی و چې د دواړو لورو د خبرو یو محور له ډېرې مالیې اخیستنې څخه ډډه کول و، د وزیر له راستنېدو وروسته مسوولینو ته هدایت ورکړل شو څو د یادې موضوع په اړه پاکستان ته یو پلاوی ولېږي.
یاد وزارت ویلي: «مخکې مو هم د زیاتو مالیاتو په اړه له عربي متحده اماراتو، ایران او ترکیې سره هیله بښونکې خبرې شوې دي.»
مالیې وزارت هیله وښوده چې په دې دور کې دغه پرېکړه بشپړه او له هغه وروسته د دواړو لورو له خوا اجرا شي.
Views: 34
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن