کابل (پژواک، ۱۶ مرغومی ۱۴۰۰): په افغانستان کې وروستیو واورو او سېلابونو ۳۴ کسانو ته مرګ ژوبله اړولې او اړوندو وزارتونو ته امر شوی چې د وروستیو اورښتونو له امله زیانمن شوو خلکو ته بېړنۍ مرستې ورسوي.
د راپورونو له مخې، په تېرو درېیو ورځو کې نږدې په ټول هېواد کې درنې وارورې اورېدلې او په هلمند، نیمروز، فراه، ننګرهار، بدخشان، جوزجان، تخار، کندهار او کابل ولایتونو کې سېلابونه راغلي دي.
د بېړنیو حالاتو وزارت چارواکو د باختر دولتي اژانس ته ویلي چې د واورو ښویېدنو او سېلابونو له امله ۱۱ کسانو خپل ژوند له لاسه ورکړی او لږ تر لږه ۲۳ نور ټپیان دي.
سرچینه زیاتوي چې د یاد وزارت کارکوونکو د نورو بنسټونو او عامو خلکو په مرسته په واورو او سېلاونو کې بند پاتې لسګونه کسان ژغورلي دي.
سرچینه لیکي چې تېره ورځ د رییس الوزرا لومړي مرستیال ملا عبدالغني برادر په مشرۍ د پېښو پر وړاندې د مبارزې کمېسیون غونډه وکړه.
سرچينه زیاتوي چې ملا برادر د کمېسیون اړوندو وزارتونو او ادارو ته امر وکړ چې د وروستیو اورښتونو له امله زیانمن شوو خلکو ته بېړنۍ مرستې ورسوي او په راتلونکي کې دې د طبیعي پېښو د رامنځته کېدو پر مهال هېوادوالو ته د مرستو رسولو لپاره پوره چمتووالی ولري.
Views: 124
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن