“که پاکستان انټرنېټ ارزانه نه کړي، افغانستان به یې له نورو وپېري”

کابل (پژواک، ۱۲ سلواغه ۱۴۰۰): د مخابراتو او معلوماتي ټکنالوجۍ وزارت د مخابراتي خدمتونو د تنظیم او د زېربناوو په برخه کې له پاکستانه د مرستې غوښتنه کړې ده؛ وایي که پاکستان انټرنېټ په لوړه بیه پلوري، افغانستان اړ دی چې له نورو هېوادونو یې وپېري.

د مخابراتي خدمتونو د تنظیم اداري (اترا) پر خپلې فېسبوکپاڼه لیکلي چې تېره ورځ د مخابراتو وزارت او د اترا ادارې سرپرست مولوي نجیب الله حقاني د بورډ غړو او د دې ادارې د بېلابېلو څانګو رییسانو د پاکستان د ملي امنیت له سلاکار معید یوسف او ورسره مل پلاوي سره د مخابراتو او معلوماتي ټکنالوجۍ په برخه کې د دوه اړخیزو همکاریو په اړه خبرې وکړې.

د خبرپاڼې له مخې، د مخابراتو او معلوماتي ټکنالوجۍ وزارت سرپرست په دې لیدنه کې د پاکستان له پلاوي وغوښتل چې د مخابراتي خدمتونو د تنظیم په برخه کې خپلې تجربې له اترا سره شریکې کړي او د زېربناوو په برخه کې هم همکاري وکړي.

سرچینې لیکلي چې حقاني له پاکستاني پلاوي سره د تاجکستان، ازبکستان او ترکمنستان په پرتله له پاکستانه د انټرنېټ په لوړه بیه اخیستلو، له پاکستان سره د مرین او دارک نوري فایبر کېبل د نښلونې او پرمختیا، له اقتصادي زیانه د مخنیوي په پار د دواړو هېوادونو ترمنځ په صفري نقطه کې د فریکونسیو له اذیت او تداخل څخه د مخنیوي، له منځنۍ اسیا، سیمې او نړۍ سره د ټرانزیټ لپاره د افغانستان له خاورې د ګټه اخیستنې او په افغانستان کې د عصري مخابراتي او معلوماتي ټکنالوجۍ اسانتیاوو رامنځته کولو او د مخابراتو او انټرنېټ په برخه کې د افغانستان اړتیاوو په اړه خبرې کړې دي.

دغه راز د مخابراتو او معلوماتي ټکنالوجي وزارت ویاند عنایت الله الکوزی وایي چې په یاده ناسته کې له پاکستانه وغوښتل شول چې د افغانستان په حدودو کې د فریکونسیو د اخلال مخه ونیسي او انټرنېټ پر افغانستان په ارزانه بیه وپلوري.

ده لیکلي: "که پاکستانی لوری انټرنېټ په جګ نرخ وپلوري، افغانستان اړ دی انټرنېټ له نورو هېوادونو وپېري، په دې ناسته کې ډارک فایبر ته د لاسرسي غوښتنه وشوه څو افغانستان ته په کرایه ورکړل شي چې ورسره به افغانستان له نړیوال انټرنېټ سره وصل شي."

د الکوزِي په وینا، په یاده ناسته کې په خوست کې د غلام خان له لارې د نوري فایبر د وصل په اړه هم خبرې اترې وشوې.

د اترا ادارې د خبرپاڼې پر بنسټ، د پاکستان د ملي امنیت مشاور معید یوسف ویلي چې دوی له افغانستان سره په مختلفو برخو کې همکاریو ته چمتو دي.

هغه وايي: "پر افغانستان د انټرنېټ خرڅلاو د بیو په اړه به بیاځلي کتنه وشي."

د سرچینې په وینا، یوسف د ځینو نورو کړنو په اړه په انلاین بڼه د ځینو پروګرامونو او سافټویرونو وړاندیز وکړ چې د مخابراتو وزارت د سرپرست له لوري د ګټور تمامېدو په صورت کې له هغو څخه د ګټې اخیستنې سپارښتنه وشوه.