“څوک حق نه لري چې خبریالان ونیسي او یا یې وګواښي”

غزني (پژواک، ۱۸ سلواغه ۱۴۰۰): د غزني د اطلاعاتو او کلتور رييس وایي، حکومت له خبریالانو او رسنیو سره د فعالیت په برخه کې هيڅ راز ستونزه نه لري او ملاتړ يې کوي او زیاتوي چې هیڅوک اجازه نه لري خبریالان وګواښي او یا یې ونیسي.

 مولوي حبیب الله مجاهد د سلواغلې په ۱۸مه پژواک خبري اژانس ته وويل چې که کوم خبریال غواړي ولسواليو ته سفر وکړي، مخکې له مخکې دې د هماغې ولسوالۍ مسوولینو ته خبر ورکوي چې له کومې ستونزې سره مخ نه شي.

مجاهد زياتوي چې له دې وروسته هيڅ نظامي او ملکي اداره پر خپل سر د خبريالانو د ګواښلو او يا نيولو حق نه لري.

هغه وويل: "که چا پر خپل سر خبريالان وګواښل او يا يې ونيول، نو د اسلامي امارت له خوا به قانوني چلند ورسره وشي."

ده دغه راز وويل چې حکومت د رسنيو ملاتړ کوي.

خو مجاهد له رسنيو وغوښتل چې دوی دې په خپلو خبرونو کې د "طالبانو" پر ځای د اسلامي امارت کلمه کاروي.

بلخوا د غزني د خبريالانو اتحاديې مرستيال رحمت الله مرجانخېل له خبريالانو د ملاتړ په برخه کې د دغه ولايت د اطلاعاتو او کلتور رياست له اقداماتو مننه وکړه.

هغه زياته کړه چې د غزني رسنۍ نه غواړي چې د اسلامي شريعت او يا هم افغاني کلتور ضد خپرونې ولري.

نوموړي دغه راز وويل چې د دوی خپرونې د اسلامي امارت له پاليسۍ سره سمې روانې دي.

په غزني کې د ملي راډیو په شمول شپږ راډیوګانې او دوه شخصي ټلوېزیونونه فعاليت کوي.

دغه راز درې راډیوګانې چې په کابل کې فعاليت کوي، په غزني کې هم اورېدل کېږي.