کابل (پژواک، ۲۸ سلواغه ۱۴۰۰): د طبي چارو پوهان هغه راپورونه ردوي چې ګواکې اومیکرون د کرونا تغییر شوې وروستۍ بڼه ده او وايي چې کرونا ډېر کلونه پاتې کېږي، انسانان دې ځانونه ورسره عادي کړي.
اوازې:
په دې وروستیو کې په ځينو رسنیو او ټولنیزو شبکو کې په دې اړه چې «اومیکرون» د کرونا تغییر شوې وروستۍ بڼه ده او پای ته رسېږي، راپورونه خپاره شوي دي.
اسلامي جمهوري خبري اژانس د «یک کارشناس چینی از پایان همه گیری کرونا در سالجاری خبر داد» په نوم راپور خپور کړی دی.
په یاد راپور کې راغلي چې د عفوني ناروغیو یوه کارپوه داسې ډاډ ورکړ، په روان میلادي کار کې د کرونا خپرېدنه نور پای ته رسېږي.
دغه کارپوه ویلي، د ټولیزې روغتیا سطحې ته د رسېدو، د واکسین، درملنو او نوو درملو د استفادې په وسیله د کرونا ویروس خپرېدل پای ته رسېدو ته نږدې دي.
په ورته وخت کې سلام نو نیوز د «اومیکرون احتمالاً آخرین جهش کروناست/ کی میتوانیم جشن پایان کرونا را بگیریم؟» په عنوان راپور خپور کړی دی.
د یاد مطلب به دوام کې راغلي، تر راتلونکو اوونیو به د کرونا صعودي حالت دوام ولري او پر دې ناروغۍ د اخته کېدو اوونیزه منځنۍ شمېره ۶۶زرو ته ورسېږي.
د «تجارت نیوز» انټرنېټي سایټ هم د «آیا کرونا به زودی به پایان میرسد؟» په نوم مطلب خپور کړی دی.
د کرونا پر اومیکرون بڼې د اخته کېدو څپه به د روان میلادي کال د فبرورۍ میاشتې تر ۲۰مې مخ پر ځوړ حالت غوره کړي او دغه سویه به ښايي د کرونا وروستۍ تغییر شوې بڼه وي.
حقیقت موندنه:
د افغان- جاپان روغتون رییس ډاکتر زلمي رښتین پژواک ته وویل، د ده په اند یاده ناروغي د نورو ویروسي ناروغیو په څېر په انسانانو کې پاتې کېږي.
د عامې روغتیا وزارت ویاند ډاکتر جاوېد هژیر وايي چې د روغتیا نړیوال سازمان تر اوسه په دې اړه چې اومیکرون د کرونا تغییر شوې بڼه ده، څه نه دي ویلي.
هغه زیاته کړه، ښايي کرونا هم د نورو ویروسونو په څېر تر کلونو پاتې وي.
په ورته وخت کې د مهر خبري اژانس په دې اړه چې کرونا ویروس تر کوم وخته له موږ سره پاتې کېدای شي؟ خپور کړی دی.
د دغه مطلب په دوام کې راغلي چې د مسیح دانشوري روغتون د عفوني برخې رییس ډاکټر پیام طبرسي ویلي: ((کرونا به کلونه له موږ سره وي، باید له ورسره ځان عیار کړو، یعنې هم واکسین وکړو او هم روغتیايي سپارښتنې په نظر کې ونیسو.))
Views: 107
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن