په تېرو ۲۴ ساعتونو کې ۲۴۸ کسان پر کرونا اخته شوي

کابل (پژواک، ۱۶ کب ١٤٠٠): عامې روغتیا وزارت وايي چې په تېرو ۲۴ ساعتونو کې په افغانستان کې ۲۴۸ کسان پر کرونا اخته شوي او یوه کس د دې ناروغۍ له امله ساه ورکړې ده.

د عامې روغتیا وزارت ویاند ډاکتر جاوېد هژیر پژواک خبري اژانس ته وویل چې په تېره یوه ورځ او شپه کې د ۱۵۲۱ کسانو د کرونا ټسټ ترسره شوی چې له دې ډلې د ۲۴۸ کسانو نتیجه مثبت وه.

د عامې روغتیا وزارت ویاند وویل چې یادې پېښې د هېواد په ۱۲ ولایتونو کې ثبت شوې دي.

نوموړي په دې اړه چې کوم ولایت کې څومره مثبتې پېښې ثبت شوې، معلومات ور نه کړل.

نوموړی وايي چې په تېره یوه شپه او ورځ کې ۱۶۳ کسان له کرونا ښه شوي دي.

د هغه په خبره، په تېرو ۲۴ ساعتونو کې یو کس د کرونا ناروغۍ له امله ساه ورکړې ده.

د هغه په خبره، تر اوسه هېواد کې څه باندې ۱۷۵ زره د کرونا مثبت پښېې ثبت شوې چې له دې ډلې ۱۵۷زره کسان له کرونا جوړ شوي، ۷۶۲۶ کسانو د دې ناروغۍ له امله ساه ورکړې ده.

Views: 13