هلمند کې د هاوان مرمۍ چاودنې د یوې کورنۍ ۷ غړي ټپیان کړي

لښکرګاه (پژواک، ۲۱ کب ۱۴۰۰): د هلمند د مارجې ولسوالۍ د «ښت» سیمې اړوند یوه کور کې د هاوان یوې زړې مرمۍ چاودنه کړې او کسان یې ټپیان کړي دي.

د هلمند د د اطلاعاتو او کلتور ریاست مرستیال مولوي محمد قاسم ریاض پژواک خبري اژانس ته وویل چې دغه پېښه پرون مازدیګر د هاوان یوې زړې مرمۍ د چاودنې له امله رامنځته شوې ده.

ریاض وویل، ټپیان چې مور، پلار او اولادونه یې په کې شامل دي، روغتون ته لېږدول شوي دي.

وړمه شپه د اروزګان د مرکز ترینکوټ ښار یوه کور کې هم د هاوان سرګلولې چاودنې له امله د یو ماشوم او دوو ښځو په ګډون درې کسان ټپیان شوي وو.