د پکتيا پوهنتون د لابراتوار ودانۍ ګټې اخيستنې ته وسپارل شوه

ګرديز(پژواک، ٢٩ حوت١٤٠٠): د ٥٠ ميليونه افغانيو په لګښت د پکتيا پوهنتون د عمومي لابراتوار ودانۍ جوړه او ګټې اخيستنې ته وسپارل شوه.

د چارواکو په خبره دغه ودانۍ چې په ياد پوهنتون جوړه شوې، د ټول پوهنتون د ساينسي پوهنځيو اړوند کار کوونکي او محصلين ترې ګټه اخيستلای شي.

د پکتيا پوهنتون ریيس پوهاند عبيدالله اخندزاده پژواک ته وويل:((دغه ودانۍ د پنځوس ميليونه افغانيو په  لګښت د لوړو زدکړو وزارت د پرمختيايي بوديجې په پيسو جوړه شوې ده.))

نوموړي وويل چې ياده ودانۍ په يو جريب ځمکه کې په دوو پوړونو کې جوړه شوې، چې د لابراتوار اړوند ټول اړين ځايونه او امکانات لري.

ده وويل، دا ودانۍ ٢٢ کاري خونې، يو سالون او يو شمېر اداري خونې هم لري او د دوو کلونو په موده کې جوړه شوې ده.

د پکتيا پوهنتون استادان د لابراتوار ودانۍ پر جوړېدو خوښي ښيئ او وايي چې دا به په عملي درسونو کې ورسره ډيره مرسته وکړي.

د ياد پوهنتون د کرنې پوهنځي استاد محمد اسمعيل وايي: ((په لوړو زدکړو کې د لابراتوار شتون ډير اړين دی چې د لابراتوار لپاره بايد مشخص ځای او  وسایل موجود وي.))

نوموړی وايي، پکتيا پوهنتون کې د لابراتوار ودانۍ تر جوړولو وروسته مهمه داده چې مجهز شي او عملي ګټه ترې واخيستل شي.

د يادولو ده چې په دې ورستيو کې پکتيا پوهنتون کې يو شمېر اداري او درسي ودانۍ جوړې شوې دي خو ياد پوهنتون لاهم  نورو  ودانيو ته اړتيا لري.

Views: 84