[restrict paid="true"]
کابل (پژواک، غويي ۹ مه ۱۴۰۱): د افغانستان ځینو پخوانیو چارواکو د کابل نننۍ برید غندلي، هغه یې بشري ضد جنایت ګڼلی او ویلي دي، پر جوماتونو، خانقا او تکیه خونو بریدونه له اسلامي او انساني ارزښتونو سره په ټکر کې دي.
د کابل امنیه قوماندانۍ ویاند خالد ځدران د معلوماتو له مخې، نن د کابل ښار د شپږمې امنيتي حوزې اړوند د علاوالدين په سيمه کې د "خلیفه صاحب" په جومات کې د جمعې تر لمانځه وروسته چاودنه وشوه.
هغه زياتوي، د لومړنیو معلوماتو له مخې، په دې چاودنه کې ۱۰ تنه وژل شوي او ۳۰ نور ټپیان دي.
ځينو سرچينو د دغې چاودنې مرګ ژوبله تر دې زياته ښودلې ده.
د افغانستان پخواني ولسمشر حامد کرزي د یوې اعلامیې په خپرولو سره، دغه چاودنه غندلي او وايي: «دغه بریدونه دسیسه ده، د پرديو د شومو اهداف د شنډولو لپاره د افغانستان د خلکو پر آګاهانه عمل او د ملي اتحاد او اتفاق پر لا زیات تقویت ټینګار کوم.«
هغه دغه بريد يو بشري ضد جنایت او د افغانستان د خلکو د سولې او یووالي د دښمنانو کار بللی.
همدارنګه، د افغانستان د ملي مصالحې شورا پخواني رییس ډاکټر عبدالله عبدالله هم دغه برید غندلي دی.
هغه زیاته کړې: "پر مساجدو، خانقاګانو او تکیه خانو بریدونه بشري ضد جنایت او له اسلامي او انساني ارزښتونو سره په ټکر کې عمل دی."
د افغانستان د ملي ثبات ټولنې مشر ضياءالحق امرخېل هم دغه بريد غندلی او له کشفي او امنیتي ځواکونو يې غوښتي چې د امنیت ټینګښت ته ځانګړی پام وکړي.
دی وايي چې ولس دې هم په دې برخه کې خپل وس همکاري وکړي.
د ياد بريد مسوولیت تر اوسه چا پر غاړه نه دی اخستی.
د راپورونو له مخې، د روانې غويي مياشتې په لومړۍ نېټه د بلخ په مرکز مزارشريف کې هم په يوه جومات کې چاودنې ۱۲ تنه ووژل او ۴۱ تنه نور يې ټپيان کړل
د دغې چاودنې مسووليت د داعش ډلې پر غاړه اخستی دی.
[/restrict]
