جلال اباد (پژواک، ۲۵ غويی ۱۴۰۱): د ننګرهار د کانال رياست چارواکي وايي، سږکال به د دغې ادارې اړوند د مالدارۍ فارم د غواګانو له محصولاتو څخه ۱۰ ميليونه افغانۍ عوايد تر لاسه کړي.
مسوولين وايي، د مالدارۍ فارم غواګانې هره مياشت ۱۶زره او ۵۰۰ لیټره شېدې ورکوي چې کلنی عوايد به يې تر لس ميليونه افغانيو ورسېږي.
د ننګرهار ولايت د کانال رياست وياند سيد همايون غريبمل نن (د غويي ۲۵مه) پژواک اژانس ته وويل چې د دغې ادارې اړوند په مالدارۍ فارم کې ۲۶۵ غواګانې شته چې له ډلې يې ۵۵ غواګانې شېدې ورکوي.
د هغه په وينا، هره ورځ له غواګانو څخه ۵۵۰ لیټره شېدې ټولېږي چې د مياشتې ۱۶زره ۵۰۰ لیټره کېږي.
غريبمل زياته کړه، له يادو شېدو څخه د کال ۱۰ ميليونه افغانۍ عوايد اټکل شوی او هڅه کېږي چې راتلونکو کلونو کې د غواګانو شمېر ډېر شي؛ څو د محصولاتو کچه يې لوړه شي.
نوموړی وایي، دغه فارم د هډې فارم امریت ته څېرمه پر ١٧ جریبه ځمکې باندې جوړ شوی.
سيد همايون غريبمل زياتوي: «پلان لرو چې د مالدارۍ شته فارم لا منظم او عصري کړو، د شېدو او لبنیاتو برخه به يې لا غښتلې کړو.»
د ننګرهار کانال رياست د مالدارۍ فارم امر انجينر شکر الله نورزي پژواک ته وويل چې دغه فارم منظم حیواني کلينيک، وترنران، د لوشنې اتومات ماشينونه، ترکيبي غذا، د البسو او دانو ساتنځايونه، منظم اوبه خور سيستم، پراخې او منظمې غوجلې او نورې اسانتياوې لري.
د ننګرهار ځینې اوسېدونکي د مالدارۍ فارم د شېدو له کيفيت او قيمته خوښ دي خو غوښتنه يې دا ده چې بايد شېدې په عام ډول د ښار ټولو هټیو ته ورسېږي.
د جلال اباد ښار د انګورباغ سيمې يوه اوسېدونکي نويد پژواک ته وويل چې پخوا به د مالدارۍ فارم ځانګړي ټانکرونه په ښار کې ګرځېدل او پر خلکو يې د مالدارۍ فارم شېدې خرڅولې؛ خو اوس دغه لړۍ بنده شوې ده.
د ننګرهار کانال رياست چارواکي وايي، هڅه کوي چې د شېدو په زياتوالي سره دغه چاره بيا پيل کړي.
Views: 73
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن