کابل (پژواک، ۲۹ غویی ۱۴۰۱): د هند د کرکټ یو پخوانی لوبغاړی، کومیدین او سیاستوال نوجوت سینګ سیدهو د قتل په یوه قضیه کې په یو کال بند محکوم شوی دی.
پر ۵۸ کلن سیدهو چې د هندوستان د پنجاب ولایت اوسیدونکی دی او د کانګریس سیاسي ګوند پورې هم تړاو لري، دا تور و چې په ۱۹۸۸ زیږدیز کال کې یې د خپل یو ملګري سره په ګډه یو تن د موټر په تمځای کې وهلی و چې وروسته یې په روغتون کې ساه ورکړې وه.
هندي رسنیو خبر ورکړی چې یوې محکمې په ۲۰۱۸ کال کې د هند د کرکټ دا پخوانی لوبغاړی یواځې د زر هندي کلدارو جریمي په ورکړې بخښلی و، خو د وژل شوي کس د کورنۍ غړیو د هیواد سترې محکمې ته عریضه او سیدهو ته یې د سختې سزا ورکولو غوښتنه وکړله.
تر دې مخکې یوې بلې محکمې په همدې قضیه کې سیدهو ته د ۳ کالونو بند سزا ورکړې وه، خو بیا سترې محکمې دا پریکړه رد کړه.
نوجوت سینګ سیدهو د هند د کرکټ د ملي لوبډلې لپاره ۵۱ د ټیسټ او ۱۳۶ یو ورځنۍ نړیوالې لوبې کړي.
د کرکټ لوبې پریښودو څخه وروسته سیدهو لومړی د هندو ملت پال ګوند بهارتیا جانتا ګوند غړی شوی خو وروسته بیا د کانګریس ګوند ته واووښت.
د سیاست تر څنګ دا پخوانی لوبغاړی په ځینو تلویزیوني خپرونو کې هم راڅرګندیږي او د (کپل شرما) په نامه د یوې مشهور پروګرام غړی هم دی.
هغه د څه مودې لپاره د پنجاب په ایالتي حکومت کې د وزیر په توګه هم دنده ترسره کړې ده.
Visits: 454
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن