کابل (پژواک، ۶ غبرګولی ۱۴۰۱) : د ملي دفاع وزارت سرپرست ننګرهار ولایت او یو شمیر ولسوالیو ته د سفر پرمهال اړوندو مسوولینو ته له خپلې خاورې د ساتنې په موخه د لازمو اقداماتو سپارښتنې وکړې.
د ننګرهار ولايت مقام لخوا د غبرګولي په ۶مه، په یوه خپره شوې خبرپاڼه کې راغلي چې د فاع وزير مولوي محمد يعقوب مجاهد دغه ولایت ته د سفر پر مهال والي حاجي ملا محمد نعيم اخند، د استخباراتو رئيس ډاکتر بشير، د ۲۰۱ خالد بن وليد قول اردو قوماندان مولوي عبدالصبور ابو دوجانه، د امنیې قوماندانۍ د امنيت امر مولوي محمد طاهر مبارز او یو شمیر نورو مسوولینو سره ولیدل.
سرچینې زیاته کړې، د يادې ناستې پر مهال د ننګرهار امنيتي وضعيت ښه وارزول شو او د امنيت لا ټينګښت په موخه لازم تدابير ونيول شول.
د دفاع وزير مولوي یعقوب همدا راز د يو شمېر مسئولينو په ملتيا شينوارو، اچين، نازيانو، مومندرې، لعلپورې او ګوشتې ولسواليو ته سفر وکړ او هلته یې قومي مخورو، ديني عالمانو او ځوانانو ته د امنيت ټينګښت ډاډ ورکړ او دوی يې همکارۍ ته را وبلل.
په خبرپاڼه کې راغلي، د افغانستان اسلامي امارت د دفاع وزير دغه راز په يو شمېر ولسواليو کې له فرضي کرښې هم ليدنه وکړه او مسئولينو ته يې له خپلې خاورې د ساتنې په موخه د لازمو اقداماتو تر سره کولو سپارښتنې وکړې.
د ملي دفاع سرپرست وزیر ننګرهار کې د ډيورنډ فرضي کرښې، د اردو له مېشتو قطعاتو او جزوتامونو لېدنه وکړه
بلخوا د ملي د فاع وزارت لخوا په یوه خپره شوې خبرپاڼه کې راغلي، چې د ملي دفاع سرپرست وزیر د دغه سفر په ترڅ کې د اړوندو مسوولينو سره په يو شمېر موضوعاتو خبرې وکړې او له دفاعي ځواکونو يې د خاورې په ساتنه او امنيت د تینګښت په برخه کې ستاينه وکړه.
هغه د دغه لیدنو په ترڅ کې د هېواد د ځمکنۍ بشپړتيا د دفاع په برخه ټينګار وکړ او له هغوی وغوښتل، چې خلکو سره د خدمت کولو په برخه کې هر اړخيزه همکاري وکړي.
د ملي دفاع سرپرست وزیر د مسوولينو د ستونزو او وړانديزونو اورېدو ترڅنګ هغوی ته لازمې ښوونې وکړې.
GET IN TOUCH
NEWSLETTER
SUGGEST A STORY
PAJHWOK MOBILE APP