د افغانستان حکومت د ملګرو ملتونو له خوا پر دوو چارواکو سفري بندیزونه لګول ناعادلانه وبلل

[restrict paid="true"]

اټلانټا (پژواک، ۳۱ غبرګولی ۱۴۰۱): د افغانستان سرپرست حکومت  د ملګرو ملتونو له خوا د زده‌کړو پر دوو لوړ پوړو چارواکو د سفري بندیزونو لګول ناعادلانه بللې او ژر تر ژره يې د لرې کولو غوښتنه کړې ده.

ملګرو ملتونو څو کاله مخکې د طالبانو پر ځینو مشرانو سفري بندیزونه لګولي وو، خو تېر کال د سولې خبرو لپاره پر ۱۵ چارواکو دغه بندیزونه د یوې مودې لپاره لرې شول او دا موده پرون پای ته ورسېده.

د فرانسې خبري اژانس (اې اېف پي) پرون په نیویارک کې د ملګرو ملتونو د ځینو سرچینو په حواله خبر ورکړی چې د ملګرو ملتونو د بندیزونو کمېټې، له سختو بحثونو وروسته له یادو ۱۵ کسانو د دیارلسو د سفري اجازې موده د ۶۰ نورو ورځو لپاره وغځوله.

اې‌ اېف‌ پي د یوې ډیپلوماتیکې سرچینې په حواله لیکلي چې دا موده درې میاشتې وروسته – که د کمېټې کوم غړی مخالفت ونه کړي – په خپله تمدیدېږي.

خو یادې ډیپلوماتیکې سرچینې ویلي، ملګرو ملتونو د افغانستان د لوړو زده‌کړو پر سرپرست وزیر عبدالباقي حقاني او د پوهنې وزارت پر مرستیال سیداحمد شهیدخېل له دې امله سفري بندیز لګولی او د لرې کېدو موده یې نه ده غځولې چې د نجونو د زده‌کړو پر وړاندې یې خنډونه جوړ کړي وو.

په دوحه کې د سیاسي دفتر مشر او د ملګرو ملتونو لپاره د اسلامي امارت له خوا اعلان شوي ځانګړي استازي سهیل شاهین بي بي سي ته ویلي: «موږ د سفرونو د استثنا هرکلی کوو، خو پر دوو مهمو غړو د ملګرو ملتونو د سفرونو بندیزونه د منلو نه دي او باید بېرته لرې شي.»

هغه زیاته کړې، د دوحې د تړون له مخې «باید د طالبانو ټول غړي د ملګرو ملتونو د بندیزونو له نوملړه ایستل شوي وای.»

شاهین ویلي، حکومت یې هر ډول خبرو ته چمتو دی، خو ټینګار کوي چې د خبرو لپاره یې باید پر مشرانو د سفر بندیزونه نه وي.

بلخوا، د افغانستان د سرپرست حکومت د لوړو زده‌کړو وزارت مرستیال، لطف‌الله خېرخواه ویلي چې دا ډول پرېکړې به یوازې «وضعیت پېچلی» کړي.

د ملګرو ملتونو له خوا دا پرېکړه داسې مهال شوې چې د لوړو زده‌کړو سرپرست وزیرعبدالباقي حقاني همدا اوس د ترکیې پر سفر بوخت دی.

د دغه وزارت پر ټویټر او فیسبوک پاڼو کې لیکل شوي چې مولوي حقاني پرون د ترکیې له یو شمېر مسوولینو سره لیدلي دي.

https://twitter.com/afmohe/status/1538738436647133185?s=20&t=oOqvCXQtDvQuHvW65nCEag

د راپورونو له مخې، ځینو هېوادونو د ملګرو ملتونو د بندیزونو کمېټه کې دا غوښتنه هم کړې چې د نورو طالب مشرانو لپاره دې هم د سفر د بندیزونو معافیت پای ته ورسېږي.

خو له اوږدو بحثونو وروسته، پر دې پرېکړه شوې چې دمګړۍ د ۱۳ طالب چارواکو د بندیزونو معافیت د ۶۰ ورځو لپاره وغځول شي.

د ملګرو ملتونو د عمومي بندیزونو نوملړ کې، د طالبانو د تېر حکومت د ۱۳۵ غړو نومونه شامل دي چې له دې ډلې ځیني یي مړه او ځیني یي اوسنۍ اداره کې هم مهمې دندې لري.

د بي بي سي د راپور له مخې، په دوی کې پر ۴۱ کسانو د سفر بندیزونه لګېدلي چې له ډلې یې بیا د ۱۳ کسانو لپاره دا بندیز په موقتي او مشروط ډول معاف شوی دی.

په دغو کسانو کې د اوسني حکومت رییس‌الوزرا ملا محمد حسن اخوند، د هغه د مرستیالانو، د بهرنیو چارو وزارت سرپرست امیر‌خان متقي، د کورنیو چارو وزارت سرپرست سراج‌الدین حقاني، د اطلاعاتو او فرهنګ وزارت سرپرست خيرالله خېرخواه او د کانونو سرپرست وزیر شهاب‌الدین دلاور نومونه هم شامل دي.

[/restrict]