اټلانټا (پژواک، ۲ چنګاښ ۱۴۰۱) : ملګري ملتونه وایي چې ددوی د وروستیو معلوماتو له مخې، په افغانستان کې د زلزلې له امله شاوخوا ۲۲۰۰ کسانو ته مرګ ژوبله اوښتې ده.
دغه زلزله چې مرکز یې له خوست ولایت څخه د ګردیز په لوري ۴۰ کیلو متره لرې وه، د ریختر په کچه ۶،۱ درجې وه، په خوست او پکتیکا ولایتونو کې یې درنه مالي او ځاني زیانونه اړولي دي.
افغانستان لپاره د ملګرو ملتونو د سرمنشي سرپرست استازي رامز الاکبروف د افغانستان په اړه د امنیت شورا جوړې شوې ځانګړې غونډې ته وویل: ” د بشري مرستو فعالینو عاجلې مرستې چمتو کړې چې د امبولانسونو لیږل، د روغتیایي وسایلو برابرول، د درملو چمتو کول، د ګرځنده روغتیایي ټیمونو لیږل او همدارنګه د خیمو، کمپلو، پلاستیکي شیتونو او خوړو لیږل پکې شامل دي.”
نوموړي دا څرګندونې نن د ملګرو ملتونو د امنیت شورا هغه ځانګړې غونډې ته وکړچې د افغانستان په تړاو د ملګرو ملتونو د سرمنشی د وروستي راپور په اړه جوړه شوې وه.
هغه زیاته کړه، د وروستیو معلوماتو له مخې، شاوخوا ۸۰۰ تنه مړه ، تر ۱۴۰۰ پورې ټپیان شوي او زرګونه کورنۍ او کورونه زیانمن شوي دي.
اکبروف وویل، په سیمه کې د ژغورنې عملیات ادامه لري او وېره ده، چې راتلونکو ورځو کې به د مرګ ژوبلې شمېره لوړه شي.
ده وویل چې د افغانستان ددفاع وزارت په مشرۍ په سیمه کې د ژغورنې او مرستو عملیات روان دي، دغه راز نورې دولتي او نادولتي موسسې هم مرستې او همکارۍ کوي.
د یوناما سرپرست وویل چې سبا به خپله سیمې ته ځي ، د قربانیانو کورنیو او زیامنو شویو سیمو څخه لیدنه کوي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن