ملګري ملتونه: په بلخاب کې ملکي تلفات او له بشري حقونو د سرغړونو ادعاوې تعقیبوو

اټلانټا (پژواک، ۵ چنګاښ ۱۴۰۱) :  په افغانستان کې د ملګرو ملتونو یوناما دفتر د سرپل بلخاب ولسوالۍ کې د ملکي تلفاتو او بشري حقونو څخه د سرغړونو د راپورونو په اړه اندیښنه ښودلې او وایي چې دا موضوع تعقیبوي.

د تېرې جمعې ورځ (د چنګاښ ۳مه) ځیني راپورونه خپاره شول چې ګواکې د سرپل په بلخاب ولسوالۍ کې د امنیتي ځواکونو او د یوه ځایي هزاره توکمه قوماندان مولوي مهدي د پلویانو ترمنځ جګړه روانه ده.

د راپورونو له مخې، مهدي د سرپرست حکومت د امنیتي ځواکونو په لیکو کې هزاره توکمه قوماندان و، خو له څه مودې راهیسې یې ترې لار بېله کړې ده.

په کابل کې د ملګرو ملتونو د دفتر (یوناما) لخوا  په ټویټر کې خپره شوې لنډه اعلامیه کې راغلي :((یوناما د شمالي ولایت سرپل په بلخاب ولسوالۍ کې د وروستیو جګړو له امله د ملکي تلفاتو، بې ځایه کیدو، د بشري حقونو د ادعا شویو جدي سرغړونو او مالي زیانونو د رپوټونو په اړه اندیښمنه ده او دغه مسله تعقیبوي..))

UNAMA is concerned by reports of civilian harm, displacement, allegations of serious human rights violations and property damage due to recent outbreak of conflict in #Balkhab district of the northern Sar-e-Pul province. UNAMA is following up. pic.twitter.com/QtMWgEl3qA

— UNAMA News (@UNAMAnews) June 29, 2022

تر دې مخې په افغانستان کې د بشري حقونو په برخه کې د ملګرو ملتونو ځانګړي راپور ورکوونکي ریچارډ بینټ له بلخاب ولسوالۍ خپاره شوي راپورونه د اندېښنې وړ بللې وې او ویلي وو  «ټولې خواوې» باید بشري حقونو ته درناوی وکړي.

هغه زیاته کړې وه،  چې له بلخاب څخه د ناقانونه وژنو، د ملکي وګړو بېځایه کېدو، د ملکیتونو ویجاړولو او د بشري حقونو د نورو سرغړونو راپورونه ځورونکي دي.

خو حکومتي چارواکي بیا یاد راپورونه ردوي او وايي چې بې اساسه او پروپاګند دي.

د ملي دفاع وزارت د شنبې په ورځ یوه اعلامیه کې وویل: «څو ورځې وړاندې د هېواد دفاعي او امنيتي ځواکونو د سرپل ولايت اړوند بلخاب ولسوالۍ کې د بغاوتګرو پر وړاندې ګډ چاڼيز عمليات ترسره کړل؛ دغو ځواکونو نن سهار د هغو سيمو په نيولو سره چې باغيان په کې موجود وو، عملیات پای ته ورسول.»

دسرپرست حکومت وياند ذبيح‌الله مجاهد  هم ویلي وو، : «موږ دا خبر ردوو، په بلخاب کې هيڅ نه دي پېښ شوي، هلته حتی لوی جنګ نه دی شوی، صرف د دې لپاره چې هغو باغيانو هلته سرغړاوی او تمرد کړی و؛ د هغوی د کنټرول لپاره ځواکونه رسېدلي وو او له رسېدو سره سم هغوی وتښتېدل او سيمه يې پرېیښې وه.»

دی زياتوي، د بلخاب ټولې سيمې تر کنټرول لاندې دي او ټول ارګانونه د اسلامي امارت له ځواکونو سره دي، هیڅ جګړه نه ده شوې.

هغه وايي: «هلته ارامه ارامي ده، دا وژنې او څه چې ويل کېږي، بلکل غلط او بې‌اساس دي؛ متاسفانه دغسې څرګندونې همېشه د بې‌اساسه افواهاتو او پروپاګندو پر اساس کېږي چې متاسفانه لوی نهادونه يې نشروي.»