په لښکرګاه کې يوه کس څلورو لمونځ کوونکو ته مرګ ژوبله اړولې

لښکرګاه (پژواک، ۲۱ چنګاښ ۱۴۰۱): د هلمند  ولایت د اطلاعاتو او فرهنګ ریاست وایي، د دغه ولایت په مرکز لښکرګاه کې يوه کس پر لمونځ کوونکو ډزې کړې، چې له امله یې يو کس وژل شوی او درې نور ټپيان دي.

د دغه ولایت د اطلاعاتو او فرهنګ رئیس حافظ راشد پژواک ته وویل چې دغه پېښه تېره شپه د لښکرګاه ښار د شپږمې امنیتي حوزې اړوند په «ګاریز» سیمه کې رامنځته شوې ده.

ده زياته کړه: «قاتل نوید احمد نومېږي او د خپل ورور او يو بل کس په همکارۍ تېره شپه نهه بجې د ماخستن لمانځه پر مهال پر ځينو کسانو ډزې کړې، یو تن وژل شوی او درې ټپيان دي.»

راشد وويل، د پېښې انګېزه تراوسه نه ده معلومه، خو په وينا يې چې سيمې ته د امنیتي ځواکونو په رسېدو سره قاتل تښتېدلی دی.

هغه زیاته کړه، د قاتل ورور او یو بل کس چې دواړه په پېښه کې پر لاس لرلو تورن دي، نیول شوي دي.