د سویډن کرکټ ملي لوبډله کې درې افغانان هم لوبېږي

اټلانټا (پژواک، ۲۲ چنګاښ ۱۴۰۱): د سویډن د کرکټ په ملي لوبډله کې درې افغان لوبغاړي هم له یوې مودې راهیسې لوبېږي.

دا مهال د سویډن کرکټ ملي لوبډله د کرکټ شل اووریز نړۍوال جام د اروپا په برخه کې، د غوراوي په سیالیو کې برخه اخیستې ده.

د سویډن د کرکټ فدراسیون د معلوماتو له مخې، د نړۍوال جام د غوراوي سیالیو لپاره په اعلان شوې ۱۴ کسیزه لوبډله کې درې افغانان هم شامل دي.

د کرکټ د چارو افغان کارپوه او خبریال مطیع‌الله عابد په فیسبوک پاڼه کې لیکلي، د سویډن په ملي لوبډله کې درې افغان لوبغاړي هر یو اسماعیل ضیاء، لمر محمد او اعظم خلیل شامل دي.

Ismaeel Zia was on fire in the final of the FanCode ECS Sweden Stockholm smashing 3️⃣9️⃣ off just 1️⃣1️⃣ balls. 🔥 @Swedish_Cricket @AlbyCricket#EuropeanCricketSeries #CricketInSweden pic.twitter.com/RABg21cOZp

— European Cricket (@EuropeanCricket) May 29, 2022

دغه افغان لوبغاړي د سویډن د «نړۍوال زلمي» په نوم یوه ځایي کلب ټیم کې لوبیدل چې په دې وروستیو کې د سویډن د کرکټ ملي لوبډلې ته یې لاره موندلې ده.

د سیف‌الرحمن په نامه یوه افغان – چې له تېرو څو کلونو راهیسې یې په سویډن کې ژوند کړی – پژواک خبري اژانس ته وویل، هلته ډیری افغانان کرکټ کوي او ورځ تر بلې د دې لوبې مینه‌وال زیاتېږي.

تر دې مخکې د نړۍوال جام لپاره اعلان شوې د فرانسې ملي لوبډله کې هم یو شمېر افغان لوبغاړي شامل کړی شوي وو.

د فرانسې د کرکټ د ویبسایټ د معلوماتو پر اساس، دغو سیالیو ته د ۱۴ لوبغاړو نومونه خپاره شوي دي چې لږ تر لږه پنځه افغانان (داوود احمدزی، روح‌الله منګل، رحمت‌الله منګل، عبدالمالک جبارخېل او ابراهیم جبارخېل) هم پکې شته.

داوود احمدزی د افغانستان د ۱۹ کلنو لوبډلې پخوانی لوبغاړی دی چې اوس په فرانسه کې ژوند کوي. نوموړي په خپل ټویټر کې د لوبغاړو تصویر خپور کړی او خپلې لوبډلې ته یې د بري‌ هیله څرګنده کړې ده.

Views: 416