کابل (پژواک، ۳ زمری ۱۴۰۱): د ریاست الوزراء اداري مرستیال وایي، د کجکي بند د برېښنا د توليد کچه ۱۵۱ میګاواټو ته رسېدلې او دغه پروژه ګټې اخیستنې ته چمتو شوې ده.
د راپور له مخې، د ۱۴۰۰ کال په مرغومي میاشت کې د هلمند ولایت د کجکي بند درېیو توربینونو ۵۰ میګاواټه برېښنا تولیدوله او د «۷۷» ترکي ساختماني شرکت له خوا یې پر درېيو توربينونو کار روان و، څو په فعالېدو سره يې د برېښنا د تولید وړتیا ۱۵۰ میګاواټو ته لوړه شي.
د ارګ په خبرپاڼه کې راغلي چې د ریاست الوزراء اداري مرستیال مولوي عبدالسلام حنفي د «۷۷» ترکي ساختماني شرکت له مرستیال براق انسال سره په کابل کې کتلي دي.
سرچینه زياتوي، د دغه شرکت د پلان پر بنسټ باید د کجکي بند د برېښنا توليد ۱۵۱ میګاواټو ته ورسېږي چې اوسمهال یې بشپړ کړی او ګټې اخيستنې ته چمتو دی.
د خبرپاڼې له مخې، د رياست الوزراء اداري مرستیال ویلي: «اسلامي امارت له کورنيو او بهرنيو پانګهوالو غواړي په هېواد کې د ډبرو سکرو، اوبو، باد او لمر په څېر برېښنا تولید په مختلفو منابعو پانګونه وکړي او اسلامي امارت د هغوي ملاتړ کوي.»
د هلمند د برېښنا شرکت مشر د تېر کال په مرغومي کې پژواک خبري اژانس ته ویلي و چې د یاد بند د هغه مهال له برېښنا څخه د هلمند ولایت کجکي، سنګین، موسی کلا او ګرشک ولسوالۍ او د هلمند او کندهار ښارونه برخمن دي.
Views: 318
GET IN TOUCH
NEWSLETTER
SUGGEST A STORY
PAJHWOK MOBILE APP