هلمند کې یو دوه کلن ماشوم ژورې څاه ته لوېدلی

لښکرګاه (پژواک، ۱۸ زمری ۱۴۰۱): د هلمند د اطلاعاتو او فرهنګ ریاست وايي، نن غرمه د دغه ولایت په نوزاد ولسوالۍ کې يو دوه کلن هلک ژورې څاه ته لوېدلی دی.

د یاد ولایت د اطلاعاتو او فرهنګ رییس حافظ راشد پژواک خبري اژانس ته وویل چې دغه پېښه د نوزاد ولسوالۍ په کوشک سيمه کې رامنځته شوې ده.

نوموړي د یادې پېښې په اړه ډېر جزئیات ور نه کړل، خو زیاته يې کړه چې دغه څاه ۳۰ متره ژوروالی لري، امنیتي ځواکونه سيمې ته رسېدلي او د ماشوم د ژغورنې هڅې روانې دي.

د يادونې ده، دا هلمند ولایت کې په تېرو څو میاشتو کې په څوم ماشوم دی چې ژورې څاه ته لوېږي.

د روان کال د چنګاښ په ۲۱مه هم د هلمند په ګرمسېر ولسوالۍ کې دوه کم عمره هلکان او يوه نجلۍ ژورې څاه ته لوېدلي وو چې نجلۍ وژغورل شوه او هلکانو ژوند له لاسه ورکړی وو.