پنجشېر کې هم د غواګانو د پوټکي ناروغۍ «لمپي‌اسکین» دوه پېښې ثبت شوې

پاراخ (پژواک، ۱۷ زمری ۱۴۰۱): مسوولین د پنجشېر ولایت د عنابه ولسوالۍ په مرکز کې د «لمپي‌اسکین» - چې د غواګانو یو ډول ویروسي ناروغي ده – د دوو مثبتو پېښو د ثبتېدو خبر ورکوي.

د راپورونو له مخې، په پوستکي کې د غوټو پېدا کېدل، د پوټکي زخمونه، په پښو کې درد او پړسوب، تبه، له خولې د ځګونو بهېدل او د خوراک کولو وړتیا نه لرل د دغې ناروغۍ له نښو ګڼل کېږي. دا ناروغي له یوه حیوان څخه بل ته انتقالېږي.

یاده ناروغي لومړی په ننګرهار، خوست، پکتیکا او لوګر ولایتونو کې لېدل شوې او د  سلګونو غواګانو د مړینې لامل شو، خو اوس د دغې ناروغۍ دوې پېښې په پنجشېر کې هم ثبت شوې دي.

د پنجشېر د کرنې رییس حافظ عبدالمجیب مشفق وایي، تېره ورځ د دغې ناروغۍ یوه پېښه په مرکز او بله د دغه ولایت په عنابه ولسوالۍ کې ثبت شوې دي.

login or register a new account.