کابل (پژواک، ۱۸ زمری ۱۴۰۱): د لوړو زدهکړو وزارت وايي، د دغه وزارت په اډانه کې يې یو نوی ریاست جوړ کړی څو د اسلامي احکامو په رڼا کې د لوړو زدهکړو ادارو تحصیلي نصاب ته بیاکتنه وکړي.
ياد شوي وزارت په خپله وېبپاڼه کې لیکلي: «په تحصیلي برخه کې اړتیا ته په کتو د ا.ا.ا د مشرتابه له لوري د لوړو زدهکړو وزارت په چوکاټ کې د تحصیلي نصاب ریاست رامنځته شو چې ۶ امریتونه او په ټولیز ډول ۵۲ کارمندان لري.»
سرچينې لیکلي، د ټولنې اړتیاوو او نړۍوالو معیارونو ته په کتو او همدارنګه د اسلامي احکامو په رڼا کې د هېواد د تحصیلي بنسټونو د تحصیلي نصاب بیاکتنه او پراختیا، د دغه ریاست اساسي موخې دي.
سرچينه کاږي، د «تحصیلي نصاب ریاست» له ایجاد راهیسې په مختلفو برخو کې د لارښود او معیارونو ترتیب، د ورکشاپونو جوړول، بررسۍ، د تحصیلي نصابونو ارزونه او تعدیل او د تایید شوي تحصیلي نصاب له پلي کولو څخه څارنه هغه فعالیتونه دي چې دغه ریاست ترسره کړي دي.
د لوړو زدهکړو وزارت په داسې حال کې د یاد ریاست د جوړېدو خبر ورکوي چې تېر کال د کانکور ازموینه د غويي له اتمې د غبرګولي تر ۱۵مې په درېیو پړاوونو کې واخیستل شوه، خو سږ کال تر اوسه د لوړه زدهکړو وزارت د کانکور ازموینو مهالوېش نه دی اعلان کړی.
شاوخوا دوې اونۍ مخکې د لوړو زدهکړو وزارت علمي مرستیال لطفالله خیرخواه د کانکور ازموینې د ځنډ په اړه پژواک خبري اژانس ته ویلي و چې د کانکور ازموینه د نجونو او هلکانو «د جلا صنفونو د ظرفیت ټاکنې موضوع» له امله ځنډېدلې ده.
Views: 78
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن