نورستان کې د شهیدانو وارثینو او معلولینو ته د معاش ورکړې لړۍ پيل شوه

پارون (پژواک، ۳ وږی ۱۴۰۱): د نورستان شهیدانو او معلولینو ریاست وايي، د دغه ولایت د شهیدانو وارثینو او معلولینو ته یې د روان کال د لومړیو شپږو میاشتو معاش ورکړې لړۍ پيل کړې چې تر راتلونکو څو ورځو به بشپړه شي.

د یادې ادارې رییس مولوي محمدنعیم پژواک خبري اژانس ته وویل، د اړوند وزارت له خوا د دغه ولایت د شهیدانو کورنیو او معلولینو لپاره ۱۰۰ میلیونه افغانۍ بودجه ځانګړې شوې ده.

هغه زیاته کړه، په همدې بنسټ یې له تېرو څو ورځو راهیسې د دغه ولایت د شهیدانو کورنیو او معلولینو ته د روان کال د لومړيو شپږو میاشتو د معاش ورکړې لړۍ پیل کړې ده.

دی وايي، تر دې مهاله په دغه ولایت کې له دوی سره ۱۵۷۶ شهیدان او ۱۱۸۹ معلولین ثبت شوي دي.

د ده په خبره، د شهیدانو او معلولینو ریاست په دې وروستیو کې د دغه ولایت به ټولو ولسوالیو کې خپلې څانګې پرانیستې څو ټول شهیدان او معلولین ثبت شي او میاشتنی معاش ورته وټاکل شي.

د نورستان ولایت یوه معلول عبدالجلیل چې له اوږده ځنډ وروسته یې معاش اخیستی و، پژواک خبري اژانس ته وویل، خوشحاله دی چې په ډېر بد اقتصادي وضعیت کې یې د شپږو میاشتو معاش پر یوه ځای تر لاسه کړ.

هغه زیاته کړه: «شهیدان او معلولین د ولس د قربانیو عملي نمونې دي، نو ځکه پر حکومتونو مو حق جوړېږي چې زموږ معاشونه پر وخت اجرا کړي.»

د یادونې ده چې د شهیدانو وارثینو او معلولینو ته د یتیمانو د شمېر او معلولیت د درجې په اندازه معاشونه ورکول کېږي چې له ۲ تر ۱۵ زره افغانیو رسېږي.