کابل (پژواک، ۳ وږی ۱۴۰۱): د افغانستان د کورنیو چارو وزارت چارواکو د «ټاپي» پروژې له مشر سره، له نړۍوالو معیارونو سره سم د دې پروژې پر امنیتي طرحې او وړاندیزونو خبرې کړې دي.
د ټاپي یا له ترکمنستانه افغانستان، پاکستان او هند ته د ګاز نللیکې پروژه – چې ۱۸۰۰ کیلومتره اوږدوالی لري او ۸۱۶ کیلومتره یې له افغانستانه تېریږي- مخکې په افغانستان کې په رسمي ډول پرانيستل شوې وه، خو تر اوسه یې عملي چارې نه دي پیل شوې.
د کورنیو چارو وزارت وایي، تېره ورځ د دغه وزارت چارواکو د ټاپي پروژې له مشر مراد امانوف سره د دې پروژې پر خوندیتوب په انلاین ناسته کې خبرې کړې دي.
سرچینې د جزئیاتو له ورکولو پرته لیکلي چې په دې غونډه کې له نړۍوالو معیارونو سره سم پر امنیتي طرحې او وړاندیزونو او د اړوندو ادارو ترمنځ د همغږۍ په تړاو خبرې شوې دي.
د راپورونو له مخې، د ټاپي پروژې لګښت لس میلیارد امریکایي ډالر اټکل شوی او دغه نللیکه به په یو کال کې د ۳۳ میلیارده کیوبک متره ګاز د انتقال وړتیا ولري.
د راپورونو له مخې، د افغانستان لپاره د دې پروژې ګټې دا دي چې هر کال به پاکستان افغانستان ته د ټرانزیت په برخه کې سلګونه میلیون ډالر ورکوي، افغانستان به هر کال له صفر اعشاريه ۶ میلیارد مترمکعب ګاز څخه برخمن کېږي او په هغو سیمو کې چې دغه نللیکه تېرېږي، خلکو ته به د کار زمینه برابره شي او سوداګری به ورسره وده وکړي.
د شنونکو په اند، که د سيمې په کچه د دې پروژې اقتصادي ګټې شريکې شي، د سياسي ناندریو په لرې کولو کې هم مرسته کولى شي.
Views: 79
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن