میدان وردګ کې یو ماشوم حوض ته لوېدلی او مړ شوی

میدان‌ښار (پژواک، ۱۲ وږی ۱۴۰۱): د میدان وردګو د پېښو پر وړاندې د چمتووالي ریاست وايي، د دغه ولایت په مرکز میدان‌ښار کې یو ۱۳ کلن ماشوم د اوبو حوض ته لوېدلی او مړ شوی دی.

له دغه ریاست څخه پژواک خبري اژانس ته په را استول شوې خبرپاڼه کې راغلي چې پېښه تېره ورځ د میدان‌ښار په شهرنو سیمه کې شوې ده.

د خبرپاڼې په حواله، دغه ماشوم له خپلې کورنۍ سره له زابل څخه دغه ولایت ته راغلی و چې له نورو ماشومانو سره د لوبو پر مهال د کلي حوض ته لوېدلی او ژوند یې له لاسه ورکړی دی.

د پېښو پر وړاندې د چمتووالي ریاست وايي، د دغه ماشوم له کورنۍ سره به مرسته وکړي.