د حج او اوقافو وزارت سږني حاجیانو ته د ۵۱۵ ډالرو د بېرته ورکولو لړۍ پيل کړه

کابل (پژواک، ۱۹ وږی ۱۴۰۱): د حج او اوقافو وزارت وایي، سږ کال د حاجیانو له لګښته څه باندې ۶ میلیون ډالر پاتې دي چې دوى يې د بېرته ورکولو لړۍ نن پيل کړه.

په همدې اړه جوړې شوې غونډې ته د حج او اوقافو وزارت سرپرست شیخ نورمحمد ثاقب وویل، سږ کال چې کوم کسان حج ته تللي وو، له تحویل کړو پېسو څخه يې يو څه پاتې دي چې دوى يې بېرته ورکوي.

هغه زیاته کړه، سږ کال له هر حاجي څخه ٤١٣٠ ډالره اخیستل شوي وو چې ٣٦١٤ ډالره لګول شوي او ٥١٥ ډالر يې بېرته ورکول کېږي.

نوموړي وویل: «سږ کال افغانستان ته ۱۳۵۸۲ کسانو سهمیه ورکړل شوې وه چې له دوی ټولو څخه ٥٣٥٧٣٥٤٧ ډالر راټول شوي وو چې له دې جملې ٤٦٩٢٧٩١٥ ډالره مصرف شوي دي.»

login or register a new account.