کابل ښار کې له درنو جرمونو سره د مبارزې ریاست یو کارکوونکی وژل شوی

کابل (پژواک، ۲۴ وږي ۱۴۰۱): د کورنیو چارو وزارت له درنو جرمونو او اداري فساد سره د مبارزې ریاست یوه کارکوونکي د کابل ښار پنځمې امنیتي حوزې اړوند سیمه کې د ناپېژاندو وسله والو په ډزو کې ژوند له لاسه ورکړ.

د یاد ریاست له خوا په خپره شوې خبرپاڼه کې راغلي چې نن سهار شاوخوا ۷ بجې ناپېژاندو وسله والو د کابل ښار په افشارو سیمه کې د دغه ریاست د ګمرکاتو مدیریت د لومړي ټیم پر امر محمد خالد ډزې وکړې او ټپي یې کړ.

خبرپاڼه کې راغلي چې محمدخالد د درملنې لپاره د پولیسو ۲۰۰ بستریز روغتون ته ولېږدول شو، خو وروسته یې د ټپونو له امله ساه ورکړه.

سرچینې لیکلي چې بریدکوونکي په یوه کرولا موټر کې سپاره وو خو تر اوسه په دې تړاو څوک نه دي نیول شوي.