پکتيا کې د ١٤ ولايتونو ترمنځ د پانکرېشن سيالۍ پيل شوې

ګردېز (پژواک، ٣١ وږى ١٤٠١): په پکتيا کې د ١٤ ولايتونو د ١٤٠ لوبغاړو ترمنځ د پانکرېشن سيالۍ پيل شوې.

په دغو سيالۍ کې له زابل، نيمروز، کندهار، ننګرهار، فارياب، دايکندي، پنجشير، پروان، بغلان، کاپيسا، کابل، خوست او پکتيا ولايتونو ورزشکارانو ګډون کړى دى.

د يادو سياليو تنظيموونکي سازګل رازمي پژواک خبري اژانس ته وويل: «دغه سيالۍ د ورزشکارانو د تشويق او ظرفيت لوړونې په موخه په لاره اچول شوي او د فدراسيون له مسوولينو څخه غواړو چې د امکاناتو په برابرولو کې راسره مرسته وکړي.»

نوموړى وايي که اسانتياوې ورته برابرې شي په دې برخه کې به ورزشکاران ښې لاسته راوړنې ولري او دغه لوبه به نوره هم پراختيا پيدا کړي.

دغه راز د بدني روزنې اولمپيک رييس نظرمحمد مطمين د دې لوبې پرانیستې پر مهال وويل، غواړي چې د ولايتونو په کچه د پانکرېشن ملې لوبډلې جوړې کړي.

نوموړي ورزشکارانو ته د امکاناتو برابرولو په برخه کې ډاډ ورکړ او ويې ويل چې د امکان تر حده په دې برخه کې ستونزې هوارې کړي.

د يادونې ده، د پانکرېشن دغه سيالۍ د پکتيا بدني روزنې رياست تر چتر لاندې د پانکرېشن فدراسيون په همکارۍ په لاره اچول شوې دي.

Views: 13