فیض آباد (پژواک، ۴ تله ۱۴۰۱): بدخشان کې ځايي سرچینې په روان کې کال کې له ګاونډیو هېوادونو له ۱۸ کلونو د کمعمره ۷۵ ماشومانو راایستل کېدو خبر ورکوي او وايي چې یادو لسګونو کسانو ته د حرفوي زدهکړو زمینه برابره شوې ده.
د دغه ولایت د کډوالو چارو رییس محمدیونس جهادمل پژواک خبري اژانس ته وویل، د دغه ریاست ثبت شوې شمېرې ښيي چې د روان کال په اوږدو کې تر اوسه له پاکستان او ایرانه ۸۳۸ کسان را ایستل شوي او بېرته دغه ولایت ته ورستانه شوي دي.
هغه وویل، په راایستل شوو کې ۷۵ کمعمره کسان هم شته چې د ارګو، خاش او جرم او شهدا ولسوالیو اصلي اوسېدونکي دي چې د اسلام کلا، تورخم او ملک بندرونو له لارې په زور راایستل شوي دي.
هغه وویل چې یادو ماشومانو ته یې د کډوالۍ نړۍوال سازمان، پوهنې او کار او ټولنیزو چارو ریاستونو په همکارۍ د خپلې خوښې حرفوي زدهکړو زمینه برابره کړې ده.
جهادمل زیاتوي، ماشومان د ټولنې زیانمنونکی قشر دی چې له جسمي او رواني پلوه ښوونې او روزنې ته اړتیا لري. هغه له کورنیو غواړي چې خپل ماشومان دې د دولتي بنسټونو په همکارۍ د خپلې خوښې حرفو او د زدهکړو نورو بنسټونو ته ورمعرفي کړي او اجازه دې نه ورکوي څو د کار لپاره نورو ملکونو ته ولاړ شي.
په همدې حال کې د بدخشان د کار او ټولنیزو چارو ریاست د کار امر صفیالله اعتمادي وویل، دغو ماشومانو ته د مرستندویه موسسو په همکارۍ د کډوالو او بېرته راستنېدونکو او کار او ټولنیزو چارو ریاستونو له خوا د حرفوي زده کړو زمینه برابرېږي.
د هغه په خبره، د دغه پروګرام له لارې یادو ماشومانو ته د کوچنیو سوداګریو، نجارۍ او ویرنګکارۍ برخو کې روزنه ورکول کېږي.
د بدخشان یو اوسېدونکی شمس الرحمن وايي، یو ۱۵ کلن زوی یې د مزدورۍ لپاره ایران ته تللی و خو له یو کال تېرېدو وروسته بېرته له یاد هېواده را وایستل شو.
د هغه په خبره، زوی یې له پولې د رااوښتو پر مهال د کډوالۍ له نړۍوال سازمانه یو کارت ترلاسه کړ چې له مخې یې اوس د حرفوي زدهکړو پروګرام کې شامل شوی دی.
نوموړی وايي، اوس یې زوی ته د زدهکړو ترڅنګ یوه اندازه معاش هم ټاکل شوی چې تر یوه بریده د دوی اقتصادي ستونزې پرې حل کېږي.
هغه د دغه روزنیز پروګرامه له امله مننه وکړه او د دوام غوښتونکی یې شو.
Views: 25
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن