امریکا اعتراف وکړ چې تېر کال یې افغانستان کې ۱۲ ملکیان وژلي

اټلانټا (پژواک، ۶ تله ۱۴۱۰): د امریکا دفاع وزارت په یوه راپور کې اعتراف کړی چې تېر کال یې په افغانستان کې ۱۲ ملکي وګړي وژلي دي.

د سي‌ان‌ان د خبر له مخې، د دفاع وزارت (پنټاګان) د تلې په ۶مه، په یوه راپور کې ویلي چې ځواکونو یې په ۲۰۲۱ زېږدیز کال په افغانستان کې د نظامي عملیاتو پر مهال ۱۲ ملکيان وژلي او پنځه نور يې ژوبل کړي دي.

له دې مخکې، د امریکا دفاع وزارت یوازې پر دې اعتراف کړی و چې په کابل کې د یوه بې‌پیلوټه هوایي برید پرمهال د یوې کورنۍ لس کسان وژلي وو.

یاد برید تېر کال د اګست په ۲۹مه، له افغانستانه د امریکایي ځواکونو تر بشپړ وتلو یوه ورځ مخکې پر یوه شکمن موټر شوی و.

د امریکا دفاع وزارت دغه‌راز ویلي چې تېر کال د جنورۍ په اتمه یو ملکي وګړی په هرات او بل د همدغه کال په اګست میاشت کې په کندهار کې د بې‌پیلوټه الوتکو په بریدونو کې وژل شوي وو.

سرچینې زیاته کړې چې تېر کال د جنورۍ په ۱۸مه، په کندهار کې د بې‌پیلوټه الوتکې برید پرمهال دوه ملکي وګړي ټپیان شوي وو.

خو د امریکا دفاع وزارت ویلي چې پر کابل هوایي برید کې د دوی ځواکونو له قانونه سرغړونه نه وه کړې، ځکه کومه سزا یې هم نه ده ورکړې.

د امریکا کانګرس له ۲۰۱۸ کال راهیسې د دغه هېواد دفاع وزارت اړ کړی څو هغوی ته خپل کلنی راپور وړاندې کړي او د هغو ملکيانو په اړه معلومات ورکړي چې د امریکا د عملیاتو له امله د نړۍ په بېلابېلو برخو کې مړه او یا هم ټپيان کېږي؛ خو د دغه راپور ځینې برخې پټې وي.