پلخمري (پژواک، ٢٠ تله ١٤٠١): د بغلان د عامې روغتيا رياست مسوولين وايي چې د تېر يو کال موده کې له هټيو او درملتونونو ټول شوي درې ټنه تاريختېر درمل او توکي يې سوځولي دي.
د بغلان د عامې روغتیا ريیس ډاکټر مسعود احمدي د تلې په ۲۰مه د یادو توکو سوځولو پر مهال پژواک خبري اژانس ته وویل چې د تېر کال په وروستيو دوو ربعو او د روان کال په لومړيو دوو ربعو کې يې د پلخمري ښار له هټيو او درملتونونو څه باندې درې ټنه تاريخ درمل او توکي راټول کړي دي.
هغه وايي چې راټول شوي یاد توکي نن د ولايت، استخباراتو، او د ښاري اصنافو د استازو پر وړاندې وسوځول شول.
دغه راز د يادو توکو سوځولو پر مهال د بغلان د استخباراتو رياست استازي مولوي صفيالله مظهري پژواک ته وويل، هیڅوک حق نه لري چې پر خلکو تاريختېر درمل او يا هم توکي وپلوري.
هغه زياتوي، که چېرې څوک د تاريختېر درملو او يا توکو پر پلور ونيول شول نو قانوني چلند به ورسره وشي.
که څه هم چې په بېلابېلو وختونو کې د حکومتي مسوولينو له لوري د تاريختېر درملو او توکو سوځولو خبر ورکول کيږي خو بيا هم د پلازمېنې کابل په ګډون د ولايتونو په يو شمېر هټيو کې تاريختېر درمل او توکي د پلور په موخه اېښودل شوي دي.
GET IN TOUCH
NEWSLETTER
SUGGEST A STORY
PAJHWOK MOBILE APP