د ننګرهار پوهنتون استاد «لیث عبدالرحیمزی» په پاکستان کې نادرکه شوی

کابل (پژواک، ۲۹ تله ۱۴۰۱): ځينې سرچينې وايي، د ننګرهار پوهنتون د ژورنالېزم پوهنځي استاد لیث عبدالرحیمزی چې د پاکستان د لاهور په پنجاب پوهنتون کې يې ماستري کوله، له تېرې یوې اونۍ راهیسې نادرکه شوی دی.

د ننګرهار پوهنتون د ژورناليزم پوهنځي استاد عباس سادات پر خپل فېسبوک ليکلي چې د ننګرهار پوهنتون ژورنالېزم پوهنځي استاد پوهنیار لیث عبدالرحیمزی د پاکستان لاهور ایالت په پنجاب پوهنتون کې د ماستري په زده‌کړو بوخت دی.

هغه زياتوي: «نوموړی له تېرې یوې اونۍ راهیسې له خپل استوګنځي نادرکه او ټیلېفوني اړیکه یې پرې ده؛ په پاکستان کې له افغان سفارته هیله کوو چې د استاد په پیدا کولو کې مرسته وکړي.»