ترینکوټ (پژواک، ۳۰ تله ۱۴۰۱): چارواکي وايي، د اروزګان په چورې ولسوالۍ کې د ملګرو ملتونو د خوړو نړۍوال پروګرام/ WFP په مالي لګښت او د افغان پرمختیایې موسسې/ ADA په تخنیکي همکاري د یوه استنادي دېوال او یوه کانال جوړولو چارې بشپړې شوې.
په دغه ولایت کې د افغان پرمختیایې موسسې مسوول انجنیر محمدنعیم مومند پژواک خبري اژانس ته وویل، د چورې ولسوالۍ په راغ کلا سیمه کې د ۱۴۵۰ متره استنادي دېوال او په شاهظفر سیمه کې د یوه کانال جوړولو کارونه شپږ میاشتې مخکې پیل شوي وو چې اوس پای ته ته ورسېدل.
هغه زیاته کړه، په دواړو پروژو کې د سیمې څه باندې ۵۰۰ کسان په کار ګومارل شوي وو چې هر یوه ته یې د میاشتې ۸۵۰۰ افغانۍ ورکول کېدې.
نوموړي پر دغو پروژو د شوي ټول لګښت په اړه معلومات ور نه کړل خو ویې ویل چې د دغه ولایت په ټولو ولسوالیو کې ورته پروژې روانې دي چې زرګونه کسان په کې د نغدو پیسو او خوراکي توکو په بدل کې په کار ګومارل شوي دي.
د اروزګان والي مولوي محمدعلي جان احمد د دغو پروژو پرانیستې مراسمو کې وویل، هغه مرستندویې ادارې چې دا ډول ټولګټې پروژې پلې کوي، د ولایت مقام دروزاې یې پر مخ پرانیستې او هر ډول همکارۍ ته ورسره ژمن دي.
د چورې اوسېدونکي له مرستندویه ادارو مننه کوي چې په دې ولسوالي کې نه یوازې ټولګټې پروژې پیل کړې، بلکې په هغو کې یې خلکو ته د کار زمینه هم برابره کړې ده.
د سیمې یوه اوسېدونکي ملا خدایداد چې په دغو پروژو کې یې شپږ میاشتې کار کړی، پژواک اژانس ته وویل، هره میاشت ۸۵۰۰ افغانۍ ورکول کېدې چې د ده په څېر د سلګونو نورو کسانو ژوند ورباندې روان و.
نوموړی له نورو مرستندویه موسسو هم غواړي چې ورته ټولګټې پروژې پلې او خلکو ته په کې د کار زمینه برابره کړي.
Views: 26
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن