هلمند  کې د پنبې او غوړیو فابریکې فعالیت پیل کړ

لښکرګاه (پژواک، ۱۳ لړم ۱۴۰۱): د هلمند د مرکز لښکرګاه اړوند په «سردارګل محمد خان» صنعتي ښارګوټي کې د پنبې او غوړیو نوې فابریکې فعالیت پیل کړ.

د یادې فابریکي د پرانستلو پر مهال د هلمند  د سوداګرۍ خونې مسوول غلام يحیی پښتون پژواک خبري اژانس ته وويل چې دغه فابریکه په یوه ساعت کې درې ټنه خام مواد پروسس کوي.

دغه راز د یادې فاریکې مرستیال محمدحلیم امیني پژواک خبري اژانس ته وویل، پر دغه فابریکې ۵۰۰ زره امریکايي ډالره لګښت راغلی او د شپږو میاشتو په موده کې یې کارونه بشپړ شوي دي.

هغه زیاته کړه، په یاده فابریکه کې به  له ۷۰ څخه تر سلو کسانو ته د کار زمينه برابره شي.

چارواکي د جزییاتو له ورکولو پرته وایي، په دغه ښارګوټي کې ۱۲۰ فابریکې شتون لري چې ډېرې یې فعال دي او پر نورو کار روان دی چې ژر فعالې شي.