کندهار (پژواک، ۱۳ لړم ۱۴۰۱): د «افکو» ودانیز شرکت د دوو شریکانو محمود کرزي او عبدالحمید هلمندي تر منځ ستونزه – چې د کندهار د عینو مېنې پر سر کلونه مخکې رامنځ ته شوې وه – د عدلیې وزارت د سرپرست او د کندهار د ځينو سوداګرو په منځګړیتوب حل شوه.
د افکو ودانیز شرکت په ۲۰۰۲ میلادي کال کې جوړ شو او د کندهار په مرکز کې یې د عینو مینې په نوم ښارګوټي د جوړولو کار پیل کړ.
دغه شرکت د محمود کرزي او عبدالحمید هلمندي په ګډون یو شمېر ونډه وال لرل، خو وروسته د همدغه ښارګوټي د چارو پر سر د محمود کرزي او عبدالحمید هلمندي تر منځ ستونزه رامنځ ته شوه.
د کندهار ولایت مقام مطبوعاتي مسوول حاجي زید نن پژواک خبري اژانس ته وویل، د دغې ستونزې د حل په موخه له ډېرې مودې راهیسي هڅې روانې وې او وروسته مشرتابه ته یوه طرحه وړاندې شوه.
دی وایي، د حکومت د مشرتابه په حکم او د عدلیې د سرپرست وزیر مولوي عبدالحکیم شرعي په مشرۍ د ځینو وزیرانو او سوداګرو په هڅو دغه ستونزه تېره ورځ (پنجشنبه د لړم پر ۱۲مه) حل شوه.
ده ونه ویل چې دغه ستونزه څنګه حل او څنګه طرحه وړاندې شوې وه، خو په وینا یې، د عینو مېنې د ونډه والو تر منځ پيسې وړل شوې وې چې بیا د اسلامي امارت د مسوولینو له خوا حاضر کړل شول.
هغه سوداګر او پانګوال چې په دې غونډه کې یې ګډون درلود وايي، د دغې ستونزې له امله په عینو مېنه کې ودانیزي چارې ولاړي یا هم ټنکنۍ شوي وې، خو اوس به یو ځل بیا د رغونې کارونه پيل شي.
د کندهار د سوداګرۍ خونې رییس محمدصدیق مومند وایي، دا چې اوسمهال د افکو کمپنۍ د شریکانو تر منځ ستونزه حل شوې، نو دوی باید له شوي ژمني او هوکړې سره سم خپلي چارې ګړندۍ کړي.
ده زیاته کړه: «عینومېنه یوه ملي پروژه ده، زموږ ډېرو هېوادوالو دلته پانګونه کړې او دا ښارګوټی باید نور هم انکشاف وکړي او سهولتونه رامنځ ته کړي.»
عینو مېنه چې د کندهار ښار په شمالي برخه کې پرته ده پر شاوخوا شل زره جریبه ځمکه ودانه شوې او یو پرمختللی ښارګوټی بلل کیږي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن