سرپل (پژواک، ۳ مرغومی ۱۴۰۱): په سرپل کې یوې بهرنۍ موسسې د ۱۶۱ ښځو په ګډون ۱۹۹ کوچنیو متشبثینو ته څلور میلیون او ۴۳۱ زره افغانۍ وېشتلې دي.
د سرپل ولايت د صنعت او سوداګرۍ امر سيد عبدالقادر ايوبي پژواک خبري اژانس ته وويل، دغه مرسته نن د ناروې د کډوالو پلاوي (NRC) له لوري د سرپل په مرکز کې پر متشبثینو وېشل شوې ده.
ده زياته کړه: «د سرپل په مرکز کې د ١٩٩ کوچنيو سوداګرو لپاره چې ١٦١ يې ښځې دي، د کډوالو لپاره د ناروې د پلاوي له بودجې څلور ميليونه، څلور سوه او يو دېرش زره افغانۍ ووېشل شوې.»
هغه وويل، هر سوداګر ته له ٢٠ تر ٣٠ زره افغانۍ وېشل شوې څو وکولای شي د اړتيا وړ خام توکې او وسايل پرې واخلي.
مرستې ترلاسه کوونکو د دغه پیسو په ترلاسه کولو خوښي وښوده او ویې ویل چې دا ډول مرستې د دوی لپاره لویه مرسته ده او د دوی سوداګري پیاوړې کوي.
د مرسته ترلاسه کوونکو له ډلې زهرا وویل: «نن هر کوچني سوداګر له شلو تر دېرش زره افغانۍ ترلاسه کړې، دغه مرستې کوچني کاروبارونه پیاوړي کوي او له دې سره مرسته کوي کارونه یې وغوړیږي او زیاته ګټه ترلاسه کړي.»
نوموړي له متشبثینو وغوښتل چې له دې پيسو د اړتيا وړ خامو توکي او وسايلو و پیري او له دې لارې پر ځان بسياينې او مالي خپلواکۍ ته ورسیږي.
Views: 10
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن