کلات (پژواک، ۴ مرغومی ۱۴۰۱): د زابل د شاهجوی ولسوالي د چینو اړوند په «هولان رباط» سیمه کې یو کتابتون جوړ او د مطالعې مینهوالو پر مخ پرانیستل شو.
د زابل پوهنتون استاد او د کتابتون مسوول امانالله حقیار پژواک خبري اژانس ته وویل، شاهجوی د دغه ولایت له ګڼمېشتو ولسوالیو ده چې د لوستو ځوانانو شمېر په کې ډېر دی.
د ده په خبره، په همدغه بنسټ یې په دې ولسوالي کې د یوه عامه کتابتون جوړولو هوډ وکړ.
هغه زیاته کړه، د کتابتون ودانۍ لپاره یوه ځايي قومي مشر مرسته ورسره کړې ده چې نه یوازې خپله نیم جریب ځمکه یې ده ته په واک کې ورکړه، بلکې د شاوخوا ۲۰۰ زره افغانیو په لګښت یې د څلورو خونو یوه ودانۍ هم ورباندې جوړه کړه.
دی وايي، تر دې مهاله یې د دغه کتابتون لپاره ۳۵۰۰ ټوکه دیني، ټولنیز، ادبي، تاریخي او نور کتابونه راټول کړي دي.
د ده په خبره، د دې ولسوالۍ ځوانان کولای شي له دې وروسته دغه کتابتون ته راشي او په ارامه فضا کې د خپلې علاقې وړ کتابونه مطالعه کړي.
نوموړي وویل، غواړي د خپلې ولسوالۍ ځوانان مطالعې ته وهڅوي او دلته دا دود عام کړي.
د زابل د اطلاعاتو او فرهنګ ریاست د ځوانانو چارو مدیر نیاز محمد زیارمل پژواک خبري اژانس ته وویل، دا ګام د ډېرې ستاینې وړ دی چې ځوانانو په یوه محرومه سیمه کې کتابتون جوړ کړ.
د شاهجوی ولسوال مولوي رحمتالله جواد هم د دغه ګام د ستاینې تر څنګ یادونه وکړه چې زده کړه او مطالعه د پرمختګ یوازینۍ لار ده.
د هولان رباط چینو سیمې ځوانان خوښ دي چې په کتابتون ورته جوړ شوی او د لا غني کولو ژمنه یې کوي.
د نورمحمد په نوم یوه ځوان پژواک ته وویل، د دې ولسوالۍ ډېر ځوانان لوستي دي او دغسې یوه عامه کتابتون ته یې اړتیا لرله.
دی وايي، هڅه کوي تل دغه کتابتون ته د مطالعې لپاره ورشي او د غني کولو لپاره یې هم له خپل وس سره سم هڅې وکړي.
ده له حکومته وغوښتل چې د دغه کتابتون د کتابونو ډېرولو په برخه کې له دوی سره مرسته وکړي.
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن