کابل (پژواک، ۱۲ مرغومی ۱۴۰۱): ایراني رسنیو د دغه هېواد د لوړو زدهکړو وزیر له قوله راپور ورکړی چې د ایران درېیو پوهنتونونو د افغان نجونو محصلینو د منلو لپاره د چمتووالي اعلان کړی دی.
دا په داسې حال کې ده چې د افغانستان د لوړو زدهکړو وزارت د روان کال د لېندۍ په ۲۹مه اعلان کړی چې په هېواد کې د نجونو لوړې زدهکړې تر امر ثاني پورې ځنډېدلې دي.
د ایران مهر خبري اژانس د راپور له مخې، په نړۍوالو چارو کې د ایران د علومو وزیر وحید حدادي اصل ویلي چې د افغان نجونو پر تحصیل د محدویتونو په لړ کې، د دغه هېواد ځيني پوهنتونونو لکه په تهران کې الزهرا پوهنتون، د بجنورد کوثر پوهنتون او په قُم کې د حضرت معصومه پوهنتون افغان نجونو محصلینو منلو لپاره د چمتووالي اعلان کړی دی.
د هغه په خبره، الزهرا پوهنتون د ۵۰ افغان نجونو محصلینو د منلو چمتووالی لري او د لیلیې تامینېدو په صورت کې د لا نور ظرفیت امکان هم لري.
هغه زیاتوي: «د بجنورد کوثر پوهنتون چې د ښځو لپاره ځانګړی دی، د هېواد په ختيځ او د شمالي خراسان ښار کې موقعیت لري، هم په دغه پوهنتون کې د تحصیل لپاره د افغان نجونو محصلینو منلو ته د چمتووالي اعلان کړی دی.»
نوموړي زیاته کړې چې په قُم ښار کې د حضرت معصومه پوهنتون هم د ۳۰۰ محصلینو لپاره د حضوري او ۱۰۰۰ نورو ته په انلاین ډول د منلو چمتووالی ښودلی دی.
هغه په ډاګه کړې چې د افغان دواطلبانو منل به په انلاین ډول او په محدوده اندازه به په حضوري بڼه وي.
Views: 102
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن